बीड: स्कॉर्पिओ आणि १० लाखांच्या मागणीसाठी विवाहितेचा छळ; पतीसह सहा जणांवर गुन्हा दाखल.

बीड: जिल्ह्यातील परळी येथे हुंडाबळीचा एक संतापजनक प्रकार समोर आला आहे. स्कॉर्पिओ गाडी आणि १० लाख रुपयांच्या मागणीसाठी विवाहितेचा शारीरिक व मानसिक छळ केल्याप्रकरणी परळी ग्रामीण पोलीस ठाण्यात पतीसह सासरच्या सहा जणांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, पूनम बालाजी आडे (वय ३०, रा. मालेवाडी, ता. परळी) यांनी याप्रकरणी फिर्याद दिली आहे. पूनम यांचा विवाह बालाजी मोतीराम आडे याच्याशी झाला होता. लग्नानंतर काही काळ व्यवस्थित गेल्यावर सासरच्या मंडळींनी स्कॉर्पिओ गाडीची मागणी करण्यास सुरुवात केली.

 

तसेच, माहेरून १० लाख रुपये घेऊन येण्यासाठी त्यांच्यावर दबाव टाकला जात होता. या मागणीला नकार दिल्यानंतर सासरच्या मंडळींनी पूनम यांचा छळ सुरू केला. त्यांना मारहाण करणे आणि मानसिक त्रास देणे असे प्रकार घडले. या जाचाला कंटाळून अखेर पीडित विवाहितेने परळी ग्रामीण पोलिसांत धाव घेतली.

या तक्रारीवरून पोलिसांनी पती बालाजी मोतीराम आडे, सासू शेषाबाई मोतीराम आडे, सासरे मोतीराम आडे, नणंद शांता बालू जाधव, नंदावा बालू शंकर जाधव आणि सवत मनिषा बालाजी आडे यांच्यावर विविध कलमांनुसार गुन्हा दाखल केला आहे. सध्या पोलीस या प्रकरणाचा अधिक तपास करत आहेत.