पुणे: अतिक्रमणांविरोधात रान उठवणाऱ्या नगरसेवकाच्याच वाढदिवसाचे शेकडो फ्लेक्स! डेक्कनपासून कर्वे रस्त्यापर्यंत बॅनरबाजी, प्रशासनाच्या भूमिकेवर प्रश्नचिन्ह

पुणे: महानगरपालिकेच्या १७ तारखेला झालेल्या सर्वसाधारण सभेत फर्ग्युसन रस्त्यावरील अतिक्रमणांच्या विरोधात अंगावर फ्लेक्स पांघरून आंदोलन करणाऱ्या आणि अतिक्रमणांवर कठोर कारवाईची मागणी करणाऱ्या नगरसेवकाच्याच वाढदिवसाचे शेकडो फ्लेक्स आता राजाराम पुलापासून थेट डेक्कनपर्यंत प्रत्येक चौकात, पथदिव्यांवर, नामफलकांवर आणि सिग्नलच्या खांबावर झळकताना दिसत आहेत. विशेष बाब म्हणजे, नगरसेवकांच्या सभागृहातील आंदोलनानंतर आणि शहरात अतिक्रमणविरोधी कारवाई सुरू झाल्यानंतरच हे फ्लेक्स मोठ्या प्रमाणात लावण्यात आल्याचे समोर आले आहे.

मंगळवारी पार पडलेल्या महापालिकेच्या पर्यावरणावरील सर्वसाधारण सभेला सुरुवात होताच भाजप नगरसेवक सुनील पांडे, रवींद्र साळेगावकर, निवेदिता एकबोटे आणि पूजा जागडे यांनी फर्ग्युसन रस्त्यावरील अतिक्रमणांकडे प्रशासनाचे आणि सभागृहाचे लक्ष वेधण्यासाठी ठिय्या आंदोलन केले होते. या आंदोलनादरम्यान सुनील पांडे आणि रवींद्र साळेगावकर यांनी अंगावर फ्लेक्स घेऊन निषेध नोंदवला होता. त्या वेळी सर्वपक्षीय नगरसेवकांनी शहरातील अतिक्रमणांच्या प्रश्नावरून महापालिका प्रशासनाला धारेवर धरले होते. या आंदोलनानंतर महापालिका आयुक्त स्वतः रस्त्यावर उतरले आणि गेल्या चार दिवसांपासून शहरातील विविध भागांत अतिक्रमणांवर धडक मोहीम सुरू झाली. आगामी दोन महिन्यांत एकही दिवस ही कारवाई थांबणार नाही, कोणत्याही दबावाला बळी न पडता संपूर्ण शहर स्वच्छ व अतिक्रमणमुक्त केले जाईल, अशी ठाम घोषणाही आयुक्तांनी केली.

मात्र, एकीकडे शहरातील अतिक्रमणांवर धडक कारवाई सुरू असताना दुसरीकडे महापालिका सभागृहात आंदोलन करून अतिक्रमण कारवाईची ठिणगी पेटवणारे नगरसेवक सुनील पांडे यांच्या वाढदिवसाचे शेकडो फ्लेक्स राजाराम पूल ते डेक्कन या पट्ट्यातील प्रमुख चौकांमध्ये, पथदिव्यांचे खांब, दिशादर्शक नामफलक आणि वाहतूक सिग्नलच्या खांबांवर लटकत असल्याचे पाहायला मिळत आहे. कर्वे नगर, एरंडवणे, नळस्टॉप, प्रभात रस्ता, भांडारकर रस्ता आणि गुडलक चौक या परिसरांसह गल्लीबोळांतील लहान-सहान चौकांमध्येही हे फ्लेक्स उभे करण्यात आले आहेत.

शहरात अतिक्रमणविरोधी मोहीम जोरात सुरू असताना या अनधिकृत फ्लेक्सवर मात्र कोणतीही ठोस कारवाई होताना दिसत नाही. यासंदर्भात विचारणा केल्यास अतिक्रमण विभागाचे अधिकारी आकाशचिन्ह व परवाना विभागाकडे बोट दाखवतात, तर आकाशचिन्ह विभाग क्षेत्रीय कार्यालयाकडे जबाबदारी ढकलत असल्याचे चित्र आहे. ज्यांनी शहरातील अतिक्रमण हटविण्याची आग्रही भूमिका घेतली, त्यांच्याच वाढदिवसाच्या फ्लेक्सवर महापालिका प्रशासनाकडून कारवाई होत नसल्याने दुटप्पी धोरणाबाबत नाराजी आणि चर्चेला उधाण आले आहे.

 



शहर

महाराष्ट्र

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *