मुंबई: 'आंबा चोरला म्हणून फाशी नसते, नीट पेपरफुटीवर चंद्रकांत पाटलांचं वादग्रस्त वक्तव्य; मूल गमावलेल्या आईला लेकरू कुठल्या बाजारातून आणाल? काँग्रेस-मनसेचा संताप'

मुंबई: भाजपचे दिग्गज नेते आणि महाराष्ट्राचे उच्च व तंत्रशिक्षण मंत्री चंद्रकांत पाटील यांच्या एका वक्तव्याने नवा वाद निर्माण झाला आहे. त्यांनी 'नीट' (NEET) पेपर फुटीची तुलना थेट 'आंबा चोरी'शी केल्यामुळे सर्व स्तरातून संताप व्यक्त केला जात आहे. काँग्रेस प्रदेशाध्यक्ष हर्षवर्धन सपकाळ आणि महाराष्ट्र नवनिर्माण सेनेने (मनसे) सोशल मीडियाच्या माध्यमातून पाटलांवर जोरदार टीकेचे अस्त्र सोडले आहे.

चंद्रकांत पाटील नेमकं काय म्हणाले होते?
सांगली दौऱ्यावर असताना पत्रकारांशी बोलताना चंद्रकांत पाटील यांनी नीट पेपरफुटी आणि दिल्लीतील आंदोलनावर भाष्य केले होते. ते म्हणाले की, "एखादा पेपर फुटल्यानंतर.. म्हणजे एखाद्याने एक आंबा चोरला, तर त्याची शिक्षा फाशी नसते ना? आंबा चोरला, तर समज देणं असतं. आणखी काही चोरलं, त्याची शिक्षा ठरली असते. प्रत्येक गोष्टीला.. फाशी फाशी असं नसतं ना," असा सवाल उच्च व तंत्रशिक्षण मंत्री चंद्रकांत पाटील यांनी विचारला होता. तसेच, या प्रकरणातील संशयितांना अटक झाली असून कारवाई होणार असल्याचे स्पष्ट असताना दिल्लीत सुरू असलेले आंदोलन राजकीय हेतूने प्रेरित असल्याचा आरोप त्यांनी केला होता.

 

काँग्रेसकडून तीव्र संताप:
चंद्रकांत पाटलांच्या या वक्तव्यानंतर राजकीय वर्तुळात तीव्र प्रतिक्रिया उमटल्या. काँग्रेस प्रदेशाध्यक्ष हर्षवर्धन सपकाळ यांनी पाटलांचा व्हिडिओ शेअर करत एक्स (ट्विटर) वरून निशाणा साधला. ते म्हणाले, "चंद्रकांत पाटील, आंबा चोरीला गेला तर दुसरा विकत घेता येतो. पण पेपरफुटीमुळे उद्ध्वस्त झालेलं विद्यार्थ्याचं भविष्य कुठल्या बाजारात मिळतं? आयुष्य संपवलेल्या विद्यार्थ्यांच्या आई-वडिलांना नवीन लेकरू कुठल्या बाजारात मिळणार?" असा भावनिक आणि संतप्त सवाल त्यांनी विचारला.

मनसेचाही कडाडून विरोध:
महाराष्ट्र नवनिर्माण सेनेनेही या वक्तव्याचा निषेध केला आहे. "'आंबा चोरला तर त्याची शिक्षा फाशी नसते' हे चंद्रकांत पाटलांचं अजब वक्तव्य आहे. २० विद्यार्थ्यांचा मृत्यू यांना आंबा चोरल्यासारखा वाटतो?" असा सवाल महाराष्ट्र नवनिर्माण सेनेच्या अधिकृत पेजवरून विचारण्यात आला असून मंत्र्यांच्या या भूमिकेवर तीव्र आक्षेप घेण्यात आला आहे.