नाशिक: १८ वर्षीय विद्यार्थ्याची मित्रांनीच दगड आणि धारदार शस्त्राने वार करून केली निर्घृण हत्या; चौघे संशयित ताब्यात

नाशिक: शहरातील पंचवटी परिसरात १८ वर्षीय तरुणावर दगड तसेच धारदार शस्त्राने सपासप वार करून त्याचा निर्घृण खून करण्यात आल्याची खळबळजनक घटना उघडकीस आली आहे. शुक्रवारी (दि. २० नोव्हेंबर २०२६) दुपारी अडीच वाजण्याच्या सुमारास टकले नगर येथील जिजामाता व्यायाम शाळेच्या दरवाजाजवळ हा थरारक प्रकार घडला. वेदांत संतोष काळे (वय १८, रा. जुने नाशिक, खैरे गल्ली) असे खून झालेल्या दुर्दैवी तरुणाचे नाव असून, या घटनेत मित्रांनीच मित्राचा काटा काढल्याचे समोर आले आहे. या प्रकरणी ८ ते १० जणांविरोधात खुनाचा गुन्हा दाखल करण्यात आला असून, त्यामध्ये तीन अल्पवयीन मुलांचाही समावेश आहे. पोलिसांनी तातडीने कारवाई करत चौघा संशयितांना ताब्यात घेतले आहे.

मिळालेल्या माहितीनुसार, हल्लेखोरांनी वेदांतला दगड आणि धारदार वस्तूंनी बेदम मारहाण केल्याने तो गंभीररीत्या जखमी होऊन रक्ताच्या थारोळ्यात कोसळला. घटनेनंतर त्याला तात्काळ उपचारासाठी जिल्हा सामान्य रुग्णालयात दाखल करण्यात आले; मात्र डॉक्टरांनी तपासणी केली असता उपचारादरम्यान त्याचा मृत्यू झाल्याचे घोषित केले. वेदांतवर हल्ला करणारा मुख्य संशयित पीयूष लोखंडे व त्याचे साथीदार यांच्यावर गुन्हा दाखल करण्यात आला आहे. पीयूष आणि वेदांत हे दोघे पंचवटीतील एकाच महाविद्यालयात शिक्षण घेत होते. अवघ्या चार दिवसांपूर्वीदेखील त्यांच्यामध्ये वाद झाला होता; मात्र या वादाचे नेमके कारण अद्याप स्पष्ट होऊ शकलेले नाही.

मृत वेदांतचे वडील महापालिकेत सफाई कामगार म्हणून कार्यरत असून त्यांना दोन मुली आणि वेदांत हा एकुलता एक मुलगा होता. घरातील एकुलत्या एक मुलाचा अशा प्रकारे अंत झाल्याने काळे कुटुंबीयांवर दुःखाचा डोंगर कोसळला आहे.

घटनेच्या काही मिनिटे अगोदर वेदांतला मित्रांचा घराबाहेर येण्यासाठी फोन आला होता. त्या वेळी त्याच्या आईने त्याला बाहेर जाऊ नको म्हणून बजावले होते तसेच त्याला दुचाकीही दिली नव्हती. तरीही वेदांत आपल्या चुलत भावासह दुचाकीवरून घराबाहेर पडला. तो जिजामाता व्यायाम शाळेच्या पायऱ्यांवर बसलेला असताना तीन दुचाकींवरून आलेल्या ९ ते १० जणांच्या टोळक्याने त्याच्याशी वाद घालत अचानक जीवघेणा हल्ला चढवला.

नाशिक शहरात सलग दुसऱ्या दिवशी हत्येची घटना घडल्याने कायदा व सुव्यवस्थेचा प्रश्न ऐरणीवर आला आहे. यापूर्वी गुरुवारी म्हसरूळ भागात चारित्र्याच्या संशयावरून पतीने पत्नीचा गळा आवळून खून केला होता. त्यानंतर जुन्या वादातून झालेल्या भांडणाचे पर्यवसान तरुणाच्या हत्येत झाल्याने नागरिकांमध्ये तीव्र चिंता व भीतीचे वातावरण पसरले आहे.



शहर

महाराष्ट्र

गुन्हा

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *