गोवा: 'एनीव्हेअर रजिस्ट्रेशन' मुळे नागरिकांना मोठा लाभ! म्हापशातील नूतनीकृत बार्देश उपनिबंधक कार्यालयाचे मुख्यमंत्री प्रमोद सावंत यांच्या हस्ते उद्घाटन

गोवा: विवाह नोंदणी तसेच इतर प्रशासकीय सेवांसाठी नागरिकांना अनावश्यक अडचणींचा सामना करावा लागू नये, यासाठी नोंदणीची प्रक्रिया अधिक सुलभ आणि सोयीस्कर करण्यात आली आहे. 'एनीव्हेअर रजिस्ट्रेशन' या संकल्पनेअंतर्गत नागरिकांना त्याचा मोठा लाभ होणार असून, इतर राज्यांतील तसेच विदेशी नागरिकांनाही गोव्यात विवाह नोंदणीची सुविधा उपलब्ध करून दिली जात असल्याची माहिती मुख्यमंत्री डॉ. प्रमोद सावंत यांनी दिली. म्हापसा येथील बार्देश नागरी उपनिबंधक कार्यालयाच्या नूतनीकरण केलेल्या वास्तूचे उद्घाटन शुक्रवारी मुख्यमंत्र्यांच्या हस्ते पार पडले, त्यानंतर ते बोलत होते.

या उद्घाटन सोहळ्याला विधानसभेचे उपसभापती जोशुआ डिसोझा, माहिती तंत्रज्ञान महामंडळाचे अध्यक्ष व आमदार डॉ. चंद्रकांत शेट्ये, राज्य निबंधक आएशा वायंगणकर, अतिरिक्त निबंधक शर्मिला गावकर, मुख्यालयातील उपनिबंधक सोनिया हळर्णकर आणि दक्षिण जिल्हा निबंधक सूरज वेर्लेकर यांच्यासह विविध मान्यवर उपस्थित होते.

यावेळी बोलताना मुख्यमंत्री प्रमोद सावंत म्हणाले की, "म्हापशात सर्व सरकारी कार्यालये एकाच छताखाली आणण्यासाठी 'बार्देश भवन'चे काम लवकरच सुरू करण्यात येणार आहे. नागरिकांना चांगल्या आणि दर्जेदार नागरी सुविधा मिळाव्यात यासाठी सरकार सातत्याने प्रयत्नशील आहे." एकीकडे विवाह नोंदणीसारख्या महत्त्वाच्या सेवा अधिक सुलभ करण्यावर भर दिला जात असतानाच, दुसरीकडे व्यावसायिक आस्थापनांमधील सुरक्षिततेबाबतही मुख्यमंत्र्यांनी ठाम भूमिका मांडली. कळंगुट येथील आगीच्या दुर्घटनेच्या पार्श्वभूमीवर खासगी व्यावसायिकांनी अग्निसुरक्षा नियमांचे काटेकोर पालन करावे, असे आवाहन त्यांनी केले असून संबंधितांना योग्य ती भरपाई दिली जाईल, असेही त्यांनी स्पष्ट केले.

प्रत्येक सरकारी कार्यालय सुसज्ज आणि सर्व सोयी-सुविधांनी युक्त असावे, असा सरकारचा आग्रह असल्याचे सांगत मुख्यमंत्र्यांनी नमूद केले की, "अनेक सरकारी कार्यालये यापूर्वी मोडकळीस आलेल्या ठिकाणी कार्यरत होती. ती सर्व कार्यालये टप्प्याटप्प्याने नवीन जागी स्थलांतरित करण्यात आली आहेत. म्हापशाच्या उपनिबंधक कार्यालयाच्या नूतनीकरणासाठी अडीच कोटी रुपये खर्च करण्यात आले आहेत."

विवाह नोंदणीसाठी तसेच 'सेल डीड' किंवा इतर महत्त्वाच्या दस्तऐवजांच्या नोंदणीसाठी उपनिबंधक कार्यालयात येणाऱ्या नागरिकांची आता उत्तम सोय होणार आहे. गोव्यात विदेशी नागरिक तसेच इतर राज्यांतील नागरिकांचीही विवाह नोंदणी केली जाते; मात्र त्यांना त्यासाठी निर्धारित शुल्क आकारले जाते. इतर अनेक राज्यांमध्ये विवाह नोंदणीची सक्ती नसली तरी गोव्यात विवाह नोंदणी कायद्याने अनिवार्य आहे, याकडेही मुख्यमंत्र्यांनी लक्ष वेधले.



शहर

महाराष्ट्र

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *