नागपूर: "मतदानाची चोरी नाही, राहुल गांधींचा मेंदूच चोरीला गेलाय"; संवैधानिक संस्थांवरील आरोपांवरून मुख्यमंत्री देवेंद्र फडणवीसांचा संताप

नागपूर: लोकसभेतील विरोधी पक्षनेते राहुल गांधी यांनी मुख्य निवडणूक आयुक्तांवर हल्लाबोल करत त्यांच्या राजीनाम्याची मागणी केली होती, तसेच निवडणुकांमधील गैरप्रकार आणि संस्थात्मक चोरीचे गंभीर आरोप केले होते. या मुद्द्यावरून महाराष्ट्राचे मुख्यमंत्री देवेंद्र फडणवीस यांनी राहुल गांधी आणि काँग्रेस पक्षावर अत्यंत आक्रमक शब्दांत जोरदार पलटवार केला आहे. राहुल गांधी हातात संविधान घेऊन केवळ राजकीय फायद्यासाठी संवैधानिक संस्थांना बदनाम करण्याचे कारस्थान रचत असल्याचा गंभीर आरोप मुख्यमंत्र्यांनी केला आहे.

नागपुरात प्रसारमाध्यमांशी संवाद साधताना मुख्यमंत्री देवेंद्र फडणवीस म्हणाले की, "राहुल गांधी यांचे डिझाइन पूर्णपणे वेगळे आहे. ते हातात संविधानाचे पुस्तक घेऊन फिरतात, परंतु त्यांची संपूर्ण रणनीती ही देशातील सर्व संवैधानिक संस्थांना बदनाम करण्याची आणि लोकांच्या मनात त्यांच्याविषयी संशय निर्माण करण्याची आहे. जेणेकरून जनतेचा या महत्त्वाच्या लोकशाही संस्थांवरील विश्वास पूर्णपणे उडावा आणि देशात अराजकता निर्माण व्हावी, असा त्यांचा सुनियोजित डाव आहे."

 

"मतदानाची नाही, राहुल गांधींचा मेंदू चोरीला गेलाय"
राहुल गांधींनी केलेल्या 'मतचोरी' आणि निवडणूक आयोगाच्या कार्यपद्धतीवरील आरोपांचा समाचार घेताना मुख्यमंत्र्यांनी उपरोचिक टोला लगावला. ते म्हणाले, "कुठेही मतांची चोरी झालेली नाही, तर राहुल गांधींचा स्वतःचा मेंदूच चोरीला गेला आहे. पराभव समोर दिसू लागल्यावर कधी ते ईव्हीएमला दोष देतात, तर कधी थेट निवडणूक आयुक्तांवरच निराधार आरोप करतात. जनतेचा काँग्रेसवरील विश्वास पूर्णपणे उडाला असून तो पुन्हा मिळवण्यासाठी त्यांचे हे सर्व केविलवाणे प्रयत्न सुरू आहेत."

संवैधानिक संस्थांचे महत्त्व आणि पावित्र्य नेहमीच अबाधित राहिले आहे, असे सांगत विरोधकांच्या या कथित 'फेक नरेटिव्ह' राजकारणाला जनता थारा देणार नाही, असा विश्वासही मुख्यमंत्री देवेंद्र फडणवीस यांनी या वेळी व्यक्त केला.