पुणे: लॉजमध्ये प्रियकरासोबत वाद; तरुण रागाने निघून गेला अन् तरुणीने संपवलं आयुष्य, हडपसरमधील घटना

पुणे: हडपसर परिसरातील एका लॉजमध्ये एकत्र थांबलेल्या तरुण-तरुणीमध्ये वाद विकोपाला गेला आणि अवघ्या काही मिनिटांत एका २२ वर्षीय तरुणीने टोकाचे पाऊल उचलत गळफास घेऊन जीवनयात्रा संपवली. साक्षी संतोष गायकवाड (वय २२, रा. हिवरे, ता. पुरंदर) असे मृत तरुणीचे नाव असून, याप्रकरणी तिच्यासोबत असलेल्या तरुणाविरुद्ध आत्महत्येस प्रवृत्त केल्याचा गुन्हा दाखल करत हडपसर पोलिसांनी त्याला अटक केली आहे. विश्वास वामनराव जगताप (देशमुख) (वय २३, रा. सासवड, ता. पुरंदर) असे अटक करण्यात आलेल्या आरोपीचे नाव आहे.

 

नेमकं काय घडलं?
पोलिसांनी दिलेल्या माहितीनुसार, पुरंदर तालुक्यातील साक्षी आणि विश्वास यांची जुनी ओळख होती. २४ तारखेला दोघेही हडपसरमधील एका लॉजमध्ये आले होते. सकाळी साडेनऊच्या सुमारास बंद खोलीत दोघांमध्ये अचानक जोरदार खटका उडाला. दोघांमधील वाद इतका वाढला की, संतापाच्या भरात विश्वास हा साक्षीला तिथेच सोडून निघून गेला. विश्वास अचानक सोडून निघून गेल्याने साक्षी प्रचंड मानसिक तणावाखाली आली. याच नैराश्यातून तिने खोलीचा दरवाजा आतून बंद करून घेत गळफास लावून घेतला. काही वेळाने हा प्रकार उघडकीसताच लॉज परिसरात एकच खळबळ उडाली.

वडिलांची तक्रार, तरुणावर गुन्हा दाखल
मुलगी बेपत्ता असल्यामुळे तिचे कुटुंबीय आधीच चिंतेत होते. त्यातच तिच्या आत्महत्येची बातमी कानावर पडताच कुटुंबीयांना मोठा धक्का बसला. यानंतर साक्षीच्या वडिलांनी थेट हडपसर पोलीस ठाण्यात धाव घेत विश्वास जगतापविरुद्ध तक्रार नोंदवली. मुलीला आत्महत्येस प्रवृत्त केल्याचा ठपका ठेवून पोलिसांनी विश्वास जगतापला तात्काळ ताब्यात घेत बेड्या ठोकल्या. या प्रकरणाचा तपास पोलीस उपनिरीक्षक रत्नदीप बिराजदार करत असून, लॉजमधील सीसीटीव्ही फुटेज, दोघांचे मोबाईल संभाषण आणि सीडीआर पडताळून वादाचे नेमके कारण शोधण्याचे काम पोलीस करत आहेत.