पुणे: जावयाचा आई-वडिलांना कॉल अन् काही क्षणांतच पुण्यात नामांकित आयटी कंपनीतील वैष्णवीचा धक्कादायक मृत्यू; हुंड्यासाठी छळाचा गंभीर आरोप

पुणे: ज्या पुण्यात क्रांतीज्योतीसावित्रीबाई फुले यांनी भिडे वाड्यात मुलींची पहिली शाळा सुरू करून स्त्री शिक्षणाची आणि तिच्या स्वातंत्र्याची मुहूर्तमेढ रोवली, त्याच पुरोगामी पुण्यात २१ व्या शतकातही हुंड्यापायी उच्चशिक्षित तरुणींचा बळी जात आहे. शिक्षणाने माणसाची विचारसरणी बदलायला हवी होती, मात्र पैशांची हाव आणि सासरची विकृती आजही निष्पाप मुलींचे आयुष्य उद्ध्वस्त करत असून असाच एक संतापजनक प्रकार पुण्यातील उंड्री भागात उघडकीस आला आहे.

बंगळुरूच्या एका नामांकित आयटी कंपनीत कार्यरत असलेल्या २३ वर्षीय वैष्णवी जरांडे या नवविवाहितेचा सासरच्या छळाला कंटाळून संशयास्पद मृत्यू झाला आहे. अवघ्या चार महिन्यांपूर्वी, ९ मे २०२६ रोजी वैष्णवीचा विवाह ओंकार संजय घिसरे याच्याशी थाटामाटात पार पडला होता. मुलीच्या सुखी संसाराचे स्वप्न उराशी बाळगून तिच्या आई-वडिलांनी लग्नात तब्बल ४५ लाख रुपये खर्च केले आणि १० तोळे सोनेही दिले. मात्र, सासरच्यांची भूक एवढ्यावर भागली नाही. वैष्णवी पुण्याहून वर्क फ्रॉम होम करत असतानाच, नवीन कार खरेदी करण्यासाठी माहेरहून आणखी ५ लाख रुपये आणावेत, यासाठी तिचा सातत्याने मानसिक आणि शारीरिक छळ सुरू झाला.

 

रात्रीच्या वेळी पतीचा धमकीचा कॉल
२४ सप्टेंबरच्या रात्री या छळाने टोक गाठले. रात्री सव्वानऊच्या सुमारास वैष्णवीने रडत रडत आईला फोन करून सासरच्या त्रासाबद्दल सांगितले. त्यानंतर अवघ्या दोन तासांत, म्हणजेच रात्री साडेअकराच्या सुमारास तिच्या पतीने थेट वैष्णवीच्या माहेरी फोन फिरवला. "तुमच्या मुलीला ताबडतोब घरी घेऊन जा, नाहीतर माझ्या हातून काहीतरी बरेवाईट घडेल," अशी थेट धमकीच त्याने दिली.

काळजात भीतीचा गोळा घेऊन आई-वडील रात्रीतून पुण्याकडे निघाले. पहाटे उंड्रीतील घरी पोहोचल्यावर त्यांच्या पायाखालची जमीनच सरकली. पोटच्या लेकीचा निष्प्राण देह एका गोधडीत गुंडाळून ठेवण्यात आला होता. वैष्णवीने पंख्याला गळफास लावून आत्महत्या केल्याचा दावा सासरच्यांनी केला असला, तरी ही निव्वळ आत्महत्या नसून तिचा घातपात करण्यात आला आहे, असा गंभीर आरोप तिच्या कुटुंबीयांनी केला आहे. या प्रकरणी वैष्णवीच्या आई-वडिलांनी दिलेल्या फिर्यादीवरून सासरच्यांविरोधात गुन्हा दाखल करण्यात आला असून, पोलीस या प्रकरणाचा पुढील तपास करत आहेत.