अकोला: पोलिसाकडून अल्पवयीन मुलीवर अत्याचार; आत्महत्येच्या प्रयत्नानंतर पीडित मुलगी कोमात

अकोला: एक अतिशय संतापजनक आणि खळबळजनक घटना समोर आली आहे. "सदरक्षणाय खलनिग्रहणाय" हे महाराष्ट्र पोलिसांचे ब्रीदवाक्य विसरत, अकोल्यातील एका नराधम पोलीस कर्मचाऱ्याने स्वतःच्याच भाड्याच्या घरातील घरमालकाच्या अल्पवयीन मुलीवर अत्याचार केल्याची भयंकर घटना घडली आहे. लग्नाचे आमिष दाखवून आणि विविध प्रलोभने देऊन या पोलीस कर्मचाऱ्याने अल्पवयीन मुलीवर वारंवार शारीरिक अत्याचार केले. या सततच्या त्रासामुळे आणि मानसिक दबावामुळे नैराश्यात आलेल्या पीडित अल्पवयीन मुलीने टोकाचे पाऊल उचलत गळफास घेऊन आत्महत्येचा प्रयत्न केला.

कुटुंबीयांच्या वेळीच लक्षात आल्यामुळे आणि प्रसंगावधान राखल्यामुळे या मुलीचे प्राण जरी वाचले असले, तरी या गंभीर घटनेमुळे आणि मानसिक धक्क्यामुळे तिची प्रकृती अतिशय चिंताजनक बनली आहे. मिळालेल्या माहितीनुसार, आत्महत्येच्या या प्रयत्नानंतर पीडित मुलगी सध्या कोमामध्ये असून ती मृत्यूशी झुंज देत आहे. तिच्यावर रुग्णालयात आपत्कालीन व अद्यावत उपचार सुरू आहेत.

पोलिसावर गुन्हा दाखल, आरोपी फरार:
पीडित मुलीच्या कुटुंबीयांनी दिलेल्या तक्रारीनुसार, आरोपी पोलीस कर्मचारी पवन वडगावे याने संबंधित अल्पवयीन मुलीला प्रेमाच्या जाळ्यात ओढत तिच्याशी अयोग्य कृत्ये केली. याप्रकरणी बाळापूर पोलीस ठाण्यात संबंधित नराधम पोलीस कर्मचाऱ्याविरोधात गंभीर कलमांखाली गुन्हा दाखल करण्यात आला आहे. मात्र, गुन्हा दाखल झाल्यापासून हा आरोपी पोलीस कर्मचारी फरार झाला असून पोलीस यंत्रणा त्याचा शोध घेत आहे.

नातेवाईक आणि ग्रामस्थांचा रोष, ठिय्या आंदोलन:
या धक्कादायक प्रकारामुळे अकोला जिल्ह्यात तीव्र संतापाची लाट उसळली आहे. एका खाकी वर्दीतील रक्षकानेच अल्पवयीन मुलीचा घात केल्यामुळे संतप्त झालेल्या पीडित मुलीचे नातेवाईक, सामाजिक संघटना आणि गावकऱ्यांनी पोलीस उपविभागीय कार्यालयासमोर तीव्र संताप व्यक्त करत ठिय्या आंदोलन सुरू केले आहे. स्थानिक पोलिसांनीच आरोपी सहकाऱ्याला फरार होण्यास मदत केल्याचा गंभीर आरोपही आंदोलकांकडून करण्यात येत आहे. जोपर्यंत नराधम पवन वडगावे याला तात्काळ अटक केली जात नाही, तोपर्यंत मागे हटणार नाही असा इशारा संतप्त नागरिकांनी दिला असून, या प्रकरणाचा सखोल तपास वरिष्ठ पातळीवर वर्ग करण्याची मागणी जोर धरत आहे.