Nashik : धर्मांतर प्रकरणात महिला ‘मास्टरमाइंड’चा संशय; गुन्हा दाखल होण्यापूर्वीच मुंबईत बदली, दोन पथके तिच्या मागावर

Nashik : नाशिकमध्ये बहुराष्ट्रीय कंपनीतील काही कर्मचाऱ्यांवर अत्याचार, विनयभंग आणि धर्मांतराच्या प्रयत्नांचे गंभीर आरोप असलेले प्रकरण समोर आले असून, या प्रकरणात एका महिलेचा “मुख्य सूत्रधार” म्हणून सहभाग असल्याचा संशय एसआयटीने व्यक्त केला आहे. संशयित निदा खान ही गुन्हा नोंद होण्यापूर्वीच सावध झाल्याने पसार असल्याचे तपासात समोर आले आहे.

पोलिसांच्या माहितीनुसार, मूळ नाशिकची असलेली निदा खान हिने काही महिन्यांपूर्वी मुंबईत बदली करून घेतली होती. सध्या ती राज्यातील दाट लोकवस्तीच्या भागात लपून असल्याचा संशय असून, एसआयटीची दोन पथके तिचा शोध घेत आहेत.

या प्रकरणात नाशिक शहरातील देवळाली कॅम्प पोलिस ठाण्यात एक आणि मुंबई नाका पोलिस ठाण्यात आठ असे एकूण नऊ गुन्हे दाखल आहेत. यामध्ये आठ महिला आणि एक पुरुष फिर्यादी आहेत.

या प्रकरणात अटक करण्यात आलेले संशयित दानिश शेख, आसिफ अन्सारी, शफी शेख, रझा मेमन, तौसिफ अत्तार आणि शाहरुख कुरेशी सध्या नाशिकरोड कारागृहात आहेत.

तपास यंत्रणांच्या मते, निदा खान हिने कंपनीतील काही तरुणींशी ओळख करून देत इतर संशयितांपर्यंत पोहोचवण्याची भूमिका बजावल्याचा संशय आहे. तिच्यासोबत आणखी एका तरुणीचा सहभाग असल्याचेही तपासात समोर आले असून, नंतर वाढलेल्या तणावामुळे ती व्यक्ती या गटापासून दूर झाल्याचे सांगितले जाते.

काही पीडित तरुणींना विशिष्ट धर्माचा पेहराव स्वीकारण्यास प्रोत्साहित करण्यात आल्याचे आणि त्यांच्यावर “धर्मसंस्कृती” लादण्याचा प्रयत्न झाल्याचा आरोपही करण्यात आला आहे. मात्र, हे सर्व आरोप तपासाधीन असून, पोलीस सखोल चौकशी करत आहेत.

दरम्यान, कंपनीने या प्रकरणावर प्रतिक्रिया देताना “आमचे शून्य सहिष्णुता धोरण असून, चौकशी सुरू असलेल्या कर्मचाऱ्यांना तात्पुरते निलंबित करण्यात आले आहे” असे स्पष्ट केले आहे.

कंपनीतील सहाय्यक जनरल मॅनेजर (एजीएम) अश्निनी चैनानी हिला न्यायालयाने १३ एप्रिलपर्यंत पोलिस कोठडी दिली होती. तिची चौकशी पूर्ण झाल्यानंतर आज तिला पुन्हा न्यायालयात हजर केले जाणार आहे. तपासात तिने तक्रारींकडे दुर्लक्ष केल्याचा तसेच काही कर्मचाऱ्यांना जाणीवपूर्वक अतिरिक्त कामाचा ताण दिल्याचा आरोप समोर आला आहे.

एसआयटीकडून या संपूर्ण प्रकरणाचा तपास सुरू असून, पुढील कारवाईचा निर्णय न्यायालयीन प्रक्रियेवर आणि चौकशीच्या निष्कर्षांवर अवलंबून राहणार आहे.