Nashik : अशोक खरातच्या कार्यालयात अमली पदार्थांचा साठा सापडला, अत्याचार प्रकरणात SIT ची कारवाई; पोलिसांना वेगळाच संशय

Nashik : महिलांना गुंगीकारक पदार्थ देऊन ‘दैवी शक्ती’, तंत्र-मंत्र आणि भविष्यवाणीच्या नावाखाली लैंगिक अत्याचार केल्याचा आरोप असलेल्या संशयित अशोक खरातच्या कार्यालयातून विशेष तपास पथकाने (SIT) हिरवट मळकट रंगाचे संशयित द्रव्य जप्त केले आहे. हे द्रव्य गुंगीकारक असल्याचा संशय व्यक्त करण्यात येत असून, पुढील तपासासाठी ते न्यायवैद्यक (फॉरेन्सिक) प्रयोगशाळेकडे पाठवण्यात आले आहे. अहवाल लवकरच अपेक्षित आहे. दरम्यान, खरातला आज (सोमवारी, दि. १३) पुन्हा न्यायालयात ‘व्हिडिओ कॉन्फरन्स’द्वारे हजर करण्यात येणार आहे.

सीए ललित पोफळे यांच्या तक्रारीबाबतही चौकशी सुरू असून, ती औपचारिक फिर्यादीत रूपांतरित होणार का, याकडे सर्वांचे लक्ष लागले आहे.

खरातविरुद्ध महिलांवरील अत्याचाराचे आठ, खंडणी आणि फसवणुकीचे प्रत्येकी पाच तसेच धमकावण्याचा एक असे एकूण १४ गुन्हे दाखल असल्याची माहिती आहे. या प्रकरणाशी संबंधित कथित ‘पेनड्राइव्ह’ पोलिसांकडे सुपूर्द करण्यात आला असून त्यातील माहितीचीही तपासणी सुरू आहे.

सरकारवाडा पोलिस ठाण्यात दाखल झालेल्या लैंगिक अत्याचाराच्या गुन्ह्यात खरात सध्या पोलिस कोठडीत आहे. एसआयटीने आतापर्यंत त्याच्याशी संबंधित अनेक जणांची चौकशी पूर्ण केली असून पुढील तपास सुरू आहे. पुढील टप्प्यात न्यायालयीन कोठडीची मागणी करून पुन्हा पोलिस कोठडी मिळवण्याची शक्यता असल्याचेही सूत्रांनी सांगितले आहे.