अमरावती: स्वतःच्याच घरावर गोळीबार घडवून आणला; निलंबित तलाठ्याचा धक्कादायक डाव पोलिसांच्या तपासात उघड

अमरावती: महिला लैंगिक अत्याचार व देशी कट्टा विक्री प्रकरणातील आरोपी तथा निलंबित तलाठी विपुल ठाकरे यानेच स्वतःच्या राहत्या घरावर गोळीबार घडवून आणल्याचा धक्कादायक उलगडा झाला आहे. गुन्हे शाखेने अवघ्या २४ तासांच्या आत या थरारक घटनेचा पर्दाफाश केला आहे. याप्रकरणी अटक केलेल्या चौघांपैकी एकाला आरोपी विपुल ठाकरे याने स्वतःच्याच घराच्या दिशेने फायर करण्यासाठी दीड लाखांची सुपारी दिली होती. मात्र हे त्याने का पटवून आणले हे अद्याप गुलदस्त्यात आहे. त्याच्या अटकेनंतरच त्या कारणाची उकल होऊ शकेल.

दुचाकीवरून आलेल्या बुरखाधारी दोघांनी आपल्या घराच्या आवारात व आपल्या दिशेने एकूण दोन गोळ्या झाडल्या, अशी तक्रार विपुल ठाकरे यांच्या पत्नी आरती यांनी नोंदविली होती. त्या तक्रारीनुसार गाडगेनगर पोलिसांनी दि. १० ऑगस्ट रोजी पहाटे संशयितांविरुद्ध खुनाचा प्रयत्न व शस्त्र अधिनियमानवे केला. १ ऑगस्ट रोजी रात्री ९ ते ९.३० च्या सुमारास अर्जुननगर परिसरातील मॉ जिजाऊ कॉलनी येथील विपुल ठाकरे याच्या घरासमोर ही घटना घडली होती. याप्रकरणी, बादशहासिंग अजाबसिंग टांक (४२), राजासिंग अजाबसिंग टांक (३२, दोन्ही रा. वडाळी), अजय भोसले (३१, रा. राजुरा) व चंद्रसिंग शाकला (३०, रा. राजस्थान, ह.मु, विपुल ठाकरेचे घर) यांना अटक केली आहे. चारही आरोपींनी गुन्ह्याची कबुली दिली. घटनास्थळी दोन रिकामी काळतुसे सुद्धा मिळाली होती.

 

वडाळीतून अटक
पोलिस आयुक्त राकेश ओला यांनी तात्काळ गुन्हे शाखेची सहा पथके तयार केली. त्यानुसार जवळपास १०० पेक्षा अधिक सीसीटीव्ही फुटेज तपासण्यात आले. दरम्यान वडाळी परिसरातून बादशहासिंग व अजय भोसले या दोघांना ताब्यात घेतले.चौकशीदरम्यान त्यांनी मोठा गौप्यस्फोट केला. फिर्यादी महिलेचे पती विपुल ठाकरे याने फायरिंग करण्यासाठी दीड लाख रुपयांची सुपारी दिली असल्याचे बादशहासिंग याने कबूल केले. त्या रकमेपैकी १० हजार रुपये चंद्रसिंग उर्फ शेरू सिंग शाकला याच्या माध्यमातून देण्यात आले. विपुल ठाकरे यानेच तो कट रचल्याची कबुली आरोपींनी केली.

अंतरिम जामिनावर होती सुनावणी

विशेष म्हणजे, विपुल ठाकरे हा महिला अत्याचार व आर्म कायद्यांतर्गत नोंद असलेल्या गुन्ह्यांचा आरोपी आहे. २ जुलै रोजी पथ्रोट पोलिसांनी एका तरुणाकडून देशी कट्टा जप्त केला होता, ज्याने तो कट्टा विपुल ठाकरे याच्याकडून विकत घेतल्याची कबुली दिली होती. त्या गुन्ह्यासंबंधाने ठाकरे याच्या अंतरिम 3 अटकपूर्व जामिनावर दि. १० ऑगस्ट रोजी अचलपूर न्यायालयात सुनावणी होणार होती.
न्यायालयात आपली बाजू मजबूत करण्यासाठी विपुल ठाकरे याने हा बनाव रचला असावा, अशी शक्यता पोलिसांनी वर्तविली आहे. गुन्हे शाखाप्रमुख दिनेश दहातोंडे व अतुल वर यांच्या नेतृत्वातील पथकाने ही उकल केली.