पुणे: राज्यात आरोग्य चिंतेत वाढ: डेंग्यूचे ३,७६२ तर हिवतापाचे २,०३६ रुग्ण नोंदवले, साथरोग नियंत्रणासाठी आरोग्य विभागाकडून कडक प्रतिबंधात्मक उपाययोजना सुरू

पुणे: महाराष्ट्रामध्ये यंदा सर्वत्र झालेला मुसळधार पाऊस आणि हवामानातील बदलांमुळे साथीच्या आजारांच्या धोक्यात मोठी वाढ झाली आहे. आरोग्य विभागाने जाहीर केलेल्या ताज्या आकडेवारीनुसार, चालू वर्षात २१ जुलै २०२६ पर्यंत संपूर्ण राज्यभरात डेंग्यूचे तब्बल ३,७६२ रुग्ण, तर हिवतापाचे (मलेरिया) २,०३६ रुग्ण आढळून आले आहेत. याशिवाय चिकुनगुनियाचे ७८४ रुग्ण आणि लेप्टोस्पायरोसीसचे २२३ बाधित रुग्ण नोंदवले गेले आहेत. या वाढत्या साथीच्या आजारांचा उद्रेक रोखण्यासाठी आणि संभाव्य धोका वेळीच नियंत्रित करण्यासाठी आरोग्य विभागाने राज्यभर तातडीच्या प्रतिबंधात्मक उपाययोजना तीव्र केल्या आहेत.

आरोग्य विभागाच्या अहवालावरून मिळालेल्या सविस्तर माहितीनुसार, यंदाच्या पावसाळी हंगामात साथीच्या आजारांवर नियंत्रण मिळवण्यासाठी आरोग्य यंत्रणा पूर्णपणे सतर्क झाली आहे. २१ जुलैपर्यंत राज्यात एकूण ४८ हजार ३४२ रक्तनमुने तपासण्यात आले, त्यापैकी ३,७६२ जणांना डेंग्यूची लागण झाल्याचे स्पष्ट झाले आहे. याशिवाय २३ हजार १११ रक्तनमुन्यांच्या तपासणीदरम्यान ७८४ जणांना चिकुनगुनिया झाल्याचे निष्पन्न झाले असून त्यांच्यावर योग्य ते वैद्यकीय उपचार सुरू आहेत.

हिवतापाचा प्रसार रोखण्यासाठी राज्यातील अतिसंवेदनशील आणि उद्रेकग्रस्त गावांमध्ये प्रशासनाकडून घरोघरी जाऊन किटकनाशक फवारणी, ताप असलेल्या रुग्णांचे सर्वेक्षण आणि तातडीने औषधोपचार करण्याची मोहीम युद्धपातळीवर राबवली जात आहे. चालू वर्षात २१ जुलैपर्यंत नोंदवलेल्या २,०३६ हिवतापाच्या रुग्णांपैकी ५४६ रुग्ण हे बाहेरून आलेले (इम्पोर्टेड) असल्याचे निदर्शनास आले आहे. विशेष म्हणजे, महाराष्ट्र शासनाने आगामी २०३० पर्यंत राज्यातून हिवतापाचे संपूर्ण निर्मूलन करण्याचे महत्त्वाकांक्षी उद्दिष्ट ठेवले असून, त्यादृष्टीने विविध प्रभावी उपाययोजनांची अंमलबजावणी केली जात आहे.

डेंग्यू आणि चिकुनगुनियाचा प्रादुर्भाव रोखण्यासाठी संशयित रुग्णांचे रक्तनमुने तपासणीसाठी त्वरित पाठवले जात आहेत. तसेच, उद्रेकग्रस्त भागांमध्ये धूर फवारणी (फॉगिंग), साचलेल्या पाणीसाठ्यांमध्ये 'टेमिफॉस' या रासायनिक कीटकनाशकाचा वापर आणि कायमस्वरूपी पाणीसाठ्यांमध्ये डासांची अंडी खाणारे 'गप्पी मासे' सोडण्याचे उपाय केले जात आहेत. या माध्यमातून नागरिकांमध्ये डासांची उत्पत्ती रोखण्याविषयी जनजागृती मोहीम देखील राबवली जात आहे. आरोग्य विभागाने नागरिकांना आपल्या घर व परिसरामध्ये पाणी साचू न देण्याचे, तापाची कोणतीही लक्षणे दिसताच तात्काळ नजीकच्या शासकीय आरोग्य केंद्रात जाऊन तपासणी करून घेण्याचे आणि डासांपासून स्वतःचे रक्षण करण्यासाठी आवश्यक ती खबरदारी बाळगण्याचे आवाहन केले आहे.

हत्तीरोग दुरीकरण आणि इतर साथीच्या आजारांची आकडेवारी:
यावर्षी हत्तीरोग दुरीकरणासाठी राज्यातील एकूण सहा जिल्ह्यांतील १६ तालुक्यांमध्ये सार्वत्रिक औषधोपचार मोहीम राबविण्यात आली. यामध्ये ठाणे, पालघर, नंदुरबार, गडचिरोली, भंडारा आणि चंद्रपूर या जिल्ह्यांचा समावेश होता. या मोहिमेअंतर्गत ३३ लाख २२ हजार ६७९ पात्र लाभार्थ्यांना हत्तीरोगविरोधी औषधे देण्याचे उद्दिष्ट ठरवण्यात आले होते, त्यापैकी ३२ लाख १४ हजार ३०० पात्र लाभार्थ्यांना हत्तीरोगविरोधी गोळ्या खाऊ घालण्यात आल्या आहेत. तसेच, याच कालावधीत अंडाशयवृध्दी (हायड्रोसील) झालेल्या १,९३४ रुग्णांवर आरोग्य विभागामार्फत यशस्वी शस्त्रक्रिया पार पाडण्यात आली आहे.

१ जानेवारी ते २१ जुलै २०२६ या कालावधीत राज्यभरात नोंदवलेली इतर साथीच्या आजारांची आकडेवारी खालीलप्रमाणे आहे:

गॅस्ट्रो: ३३ रुग्ण

अतिसार (डायरिया): ३२४ रुग्ण

कावीळ: ११२ बाधित, १ मृत्यू

लेप्टोस्पायरोसीस: ५,८४३ तपासण्या, २२३ बाधित

इन्फ्ल्यूंझा ए (एच१एन१/एच३एन२): ८,२८,१५८ तपासण्या, ३०३ बाधित

स्क्रब टायफस: २१ बाधित, कोणतीही जीवितहानी नाही