नवी दिल्ली: सीबीएसईच्या निकालांच्या पोर्टलवर परदेशातून सायबर हल्ला! केंद्रीय यंत्रणा सतर्क; विद्यार्थ्यांच्या डेटाची सुरक्षा सुरक्षित

नवी दिल्ली: केंद्रीय माध्यमिक शिक्षण मंडळाच्या (CBSE) निकालोत्तर सेवा पोर्टलवर देश आणि परदेशातून मोठे सायबर हल्ले झाल्याची धक्कादायक माहिती समोर आली आहे. या हल्ल्यांचा मुख्य हेतू प्रणाली विस्कळीत करणे हा होता, असे तपासात स्पष्ट झाले आहे.

काय घडले? अत्याधुनिक तंत्रज्ञानाचा वापर करून आणि समन्वयाने हे हल्ले करण्यात आले होते.सीबीएसईची प्रणाली ठप्प करण्याच्या उद्देशाने हे प्रयत्न झाले, मात्र सुरक्षा यंत्रणांनी ते वेळीच रोखले. या घटनेनंतर सीबीएसईने तातडीने दिल्ली पोलिसांच्या इंटेलिजन्स फ्युजन अँड स्ट्रॅटेजिक ऑपरेशन्स (IFSO)युनिटकडे तक्रार दाखल केली आहे.

विद्यार्थ्यांचा डेटा सुरक्षित:या संपूर्ण सायबर हल्ल्याच्या प्रकारात कोणतीही माहिती (डेटा) लीक झालेली नाही, किंवा कोणत्याही अनधिकृत व्यक्तीने प्रणालीमध्ये घुसखोरी केलेली नाही, असे अधिकृतपणे स्पष्ट करण्यात आले आहे.

विद्यार्थ्यांची माहिती पूर्णपणे सुरक्षित असून घाबरण्याचे कोणतेही कारण नाही, असे मंडळाकडून सांगण्यात आले आहे. सध्या आयआयटी कानपूर आणि आयआयटी मद्रासच्या मदतीने या प्रणालीला अधिक अभेद्य बनवण्यासाठी आणि सुरक्षिततेसाठी विशेष प्रयत्न सुरू आहेत.