सावंतवाडी बसस्थानकात १२ तोळ्यांचे दागिने लंपास करणाऱ्या सराईत महिला चोरट्यास जालन्यात बेड्या

सिंधुदुर्ग: सावंतवाडी बसस्थानक परिसरात एका महिला प्रवाशाचे तब्बल १२ तोळे सोन्याचे दागिने लंपास करणाऱ्या सराईत महिला चोरट्याला गजाआड करण्यात सिंधुदुर्ग पोलीस व स्थानिक गुन्हे शाखेला मोठे यश आले आहे. जालना जिल्ह्यातील मंठा येथे सापळा रचून पोलिसांनी या आरोपी महिलेस शिताफीने ताब्यात घेतले.

संगीता सुभाष जाधव (वय ३५, रा. मंठा, जिल्हा जालना) असे अटक करण्यात आलेल्या संशयित महिला चोराचे नाव आहे. प्राप्त माहितीनुसार, सावंतवाडी बसस्थानकावर एका महिला प्रवाशाचे मौल्यवान सोन्याचे दागिने अचानक चोरीला गेल्याची घटना घडली होती. याप्रकरणी सावंतवाडी पोलीस ठाण्यात गुन्हा दाखल करण्यात आला होता. घटनेचे गांभीर्य लक्षात घेत पोलिसांनी तातडीने तपासाची चक्रे हलवली.

तपासादरम्यान सावंतवाडी पोलीस आणि स्थानिक गुन्हे अन्वेषण शाखेच्या (एलसीबी) संयुक्त पथकाने बसस्थानक व परिसरातील सीसीटीव्ही फुटेजची कसून तपासणी केली. तसेच तांत्रिक विश्लेषणाच्या आधारे गुन्हेगाराचा माग काढण्यात आला. या तांत्रिक आणि खबऱ्यांच्या पुराव्यावरून सराईत गुन्हेगार संगीता सुभाष जाधव हिनेच ही चोरी केल्याची माहिती पोलिसांच्या हाती लागली. ती जालना भागात असल्याची खात्रीशीर माहिती मिळाल्यानंतर, सिंधुदुर्ग पोलिसांच्या पथकाने जालन्यातील मंठा येथे जाऊन सापळा रचला आणि आरोपी महिलेला ताब्यात घेतले.

पोलिसांनी केलेल्या कसून चौकशीदरम्यान आरोपी संगीता जाधव हिने सावंतवाडी बसस्थानकावर चोरी केल्याची कबुली दिली आहे. एलसीबीचे पोलिस निरीक्षक प्रवीण कोल्हे व सावंतवाडीचे पोलिस निरीक्षक राजेंद्र मगदुम यांच्या मार्गदर्शनाखाली या पथकाने ही यशस्वी धडक कारवाई पार पाडली. या कारवाईमुळे महिला प्रवाशांमध्ये सुरक्षिततेचा आत्मविश्वास वाढला असून सराईत गुन्हेगारांचे धाबे दणाणले आहेत.