एसटीच्या एनसीएमसी कार्डवरील रिचार्ज कपातीवरून मोठा वाद; प्रवाशांच्या पैशांवर खासगी कंपनीचा डल्ला, नागपुरात तीव्र संताप

नागपूर: राज्य मार्ग परिवहन महामंडळाच्या (एसटी) 'एनसीएमसी' (नॅशनल कॉमन मोबिलिटी कार्ड) कार्डमधील कोट्यवधी रुपये महामंडळाऐवजी थेट खासगी कंपनीच्या तिजोरीत जमा होत असल्याचा धक्कादायक प्रकार समोर आला आहे. यामुळे एसटीचे मोठे आर्थिक नुकसान होत असून प्रवाशांमध्येही तीव्र अविश्वास निर्माण झाला आहे. या संपूर्ण प्रकारावरून आणि प्रवाशांच्या रिचार्जमधील अनधिकृत कपातीवरून महाराष्ट्र एसटी कामगार सेना आणि विविध ज्येष्ठ नागरिक संघटना आक्रमक झाल्या आहेत.

सध्याच्या घडीला राज्यात सुमारे ६ कोटी सवलतधारक प्रवासी असून, आतापर्यंत सुमारे १ कोटी २० लाख प्रवाशांनी नॅशनल कॉमन मोबिलिटी कार्ड (एनसीएमसी) घेतले आहे. मात्र, या कार्डाच्या रिचार्ज प्रक्रिया आणि निधी वितरणावर मोठा प्रश्नचिन्ह उपस्थित झाला आहे. प्रवाशांनी कार्डमध्ये १०० रुपयांचा भरणा केल्यास, प्रत्यक्षात पूर्ण रक्कम जमा होत नसून त्यातून काही पैसे कपात होत असल्याचा गंभीर आरोप करण्यात आला आहे. यामुळे सामान्य प्रवाशांची व विशेषतः ज्येष्ठ नागरिकांची आर्थिक फसवणूक होत असल्याचे स्पष्ट झाले आहे.

या संपूर्ण व्यवस्थेमुळे एसटी महामंडळाला मिळणारा निधी आणि शुल्काची रक्कम थेट खासगी कंपनीच्या खात्यात जात असल्याचा दावा महाराष्ट्र एसटी कामगार सेनेने केला आहे. रिचार्जवरील शुल्क आणि निधी एसटी महामंडळाच्या खात्यातच जमा व्हावा, अशी आक्रमक भूमिका कामगार संघटनांनी घेतली आहे. तसेच, बायोमेट्रिक प्रक्रियेतील तांत्रिक अडचणींमुळे अनेक पात्र महिला व ज्येष्ठ नागरिकांना अद्याप कार्ड मिळालेले नाही, ज्यामुळे त्यांना प्रवासातील सवलतीपासून वंचित राहावे लागत आहे.

कार्ड नसलेल्या किंवा कार्ड मिळण्यात अडचणी येत असलेल्या प्रवाशांना पूर्वीप्रमाणे आधार कार्ड किंवा इतर ओळखपत्रांच्या आधारे सवलत पूर्ववत सुरू ठेवावी, तसेच रिचार्जमधील कपात तात्काळ थांबवून प्रत्येक व्यवहाराची छापील पावती प्रवाशांना द्यावी, अशी जोरदार मागणी नागपूरसह राज्यभरातून केली जात आहे. जर या मागण्यांकडे दुर्लक्ष केले, तर तीव्र स्वरूपाचे आंदोलन छेडण्यात येईल, असा इशाराही विविध संघटनांच्या वतीने देण्यात आला आहे.