Mahakukbh Mela Stampede : कुंभमेळ्यात चेंगराचेंगरीची घटना कशी घडली? प्रत्यक्षदर्शींनी सांगितला भयानक अनुभव

Mahakukbh Mela Stampede : प्रयागराजमध्ये आयोजित करण्यात आलेल्या महाकुंभ मेळ्यामध्ये आज मोठी दुर्घटना घडली. याठिकाणी झालेल्या चेंगराचेंगरीदरम्यान १० भाविकांचा मृत्यू झाला तर अनेक जण जखमी झाले. मौनी अमावस्येनिमित्त अमृतस्नान करण्यासाठी देश-विदेशातील नागरिकांनी कुंभमेळ्यात मोठी गर्दी केली आहे. याठिकाणी कडक सुरक्षाव्यवस्था करण्यात आली आहे असे असताना देखील संगम घाटावर चेंगराचेंगरी झाली. या घनटनेनंतर एकेच गोंधळ उडाला आणि भाविकांची पळापळ झाली. सर्वजण आपला जीव वाचवण्यासाठी सैरावैरा पळत होते.

पोलिसांनी कशीतरी परिस्थिती नियंत्रणात आणली. घटनास्थळावरचे काही फोटो समोर आले आहेत त्यावरून त्याची भीषणता लक्षात येत आहे. भाविकांचे सामान, चप्पल, कपडे सर्वत्र विखुरलेले दिसत आहे. या चेंगराचेंगरीमध्ये जखमी झालेल्यांना तात्काळ रुग्णालयामध्ये दाखल करण्यात आले आहे. जखमींमध्ये अनेकांची प्रकृती गंभीर आहे त्यामुळे मृतांचा आकडा वाढण्याची शक्यता आहे. अनेकांच्या सोबत असलेले त्यांचे नातेवाईक हरवले. ही घटना नेमकी कशी घडली याबाबतची भयानक परिस्थिती प्रत्यक्षदर्शींनी सांगितली आहे.

एका प्रत्यक्षदर्शींनी दिलेल्या माहितीनुसार, आंघोळीनंतर जमावाला बाहेर पडण्याचा मार्ग न मिळाल्याने चेंगराचेंगरी झाली. काही लोकं वाटेत असलेल्या लोखंडी डस्टबिनवर आदळले त्यामुळे ते पडले आणि त्यांच्यासोबत इतर लोकही पडले. त्याचवेळी प्रचंड गर्दी असल्यामुळे काही महिलांचा श्वास गुदमरला. सर्वजण एकमेकांच्या अंगावर पडले. गर्दी ऐवढी होती की सर्वजण ढकलले जात होते. त्यामुळे काही वेळातच बॅरिकेडिंग तुटून चेंगराचेंगरी झाली.

CIDCO Lottery : सिडकोच्या घरांना नापसंती, दीड लाखांपेक्षा जास्त अर्ज; फक्त १५ हजार अर्जदारांनी भरली अनामत रक्कम

एका महिलेने सांगितले की, 'मला श्वासोच्छवासाचा त्रास होत आहे. मला खूप दडपण येत आहे. खूप त्रास होत आहे.' एका रुग्णवाहिका चालकाने सांगितले की, 'त्यांनी रुग्णालयात २० फेऱ्या केल्या आहेत आणि आज एकट्याने ३५ रुग्णांना रुग्णालयात नेले आहे.'

चेंगराचेंगरीमध्ये अडकलेल्या एका व्यक्तीने सांगितले की, 'चेंगराचेंगरी झाली तेव्हा मीही तिथे होतो. आंघोळीनंतर कुठे जायचे हे गर्दीला समजत नव्हते. ठिकठिकाणी ठेवलेले लोखंडी डस्टबीनही भाविकांना दिसत नव्हते. त्यामुळे अनेकजण पडून त्यांच्या सोबत असलेल्या बॅगा आणि इतर सामान इकडे-तिकडे पडले गेले. मी स्वतः पडलो आणि माझ्या पायाला दुखापत झाली. माझे आई-वडीलही खाली पडले. ज्यांना मी मदत केली. गर्दीतील काही तरुण घाबरून एकमेकांना धक्काबुक्की करू लागले त्यामुळे चेंगराचेंगरी झाली.'

आणखी एका भाविकाने सांगितले की, 'बाहेर पडण्याचा मार्ग पूर्णपणे ठप्प झाल्यामुळे चेंगराचेंगरी झाली. आम्ही चार जण होतो. आमचे काही मित्र आधीच नंदनी द्वारला पोहोचले होते. आम्ही मागे राहिलो आणि अचानक रस्ता पूर्णपणे बंद झाला. समोर लोकं पडत होती आणि मागूनही गर्दी वाढत होती. त्यामुळे चेंगराचेंगरीची परिस्थिती निर्माण झाली.'