धक्कादायक! लग्नानंतर अवघ्या ५ महिन्यांत माजी 'मिस पुणे' त्विशा शर्माचा संशयास्पद मृत्यू; हुंडाबळीचा आरोप

भोपाळ: माजी 'मिस पुणे' आणि सोशल मीडिया कंटेंट क्रिएटर त्विशा शर्मा (वय ३३) हिचा लग्नानंतर अवघ्या पाच महिन्यांत संशयास्पद मृत्यू झाल्याची धक्कादायक घटना समोर आली आहे. मध्य प्रदेशातील भोपाळ येथील कटारा हिल्स भागातील तिच्या सासरच्या घरात १२ मे रोजी त्विशाचा मृतदेह गळफास घेतलेल्या अवस्थेत आढळून आला. या घटनेमुळे एकच खळबळबळ उडाली असून, त्विशाच्या कुटुंबीयांनी तिच्या पतीवर आणि सासरच्या लोकांवर गंभीर आरोप केले आहेत.

लव्ह मॅरेज की छळाचा सापळा?
मूळची उत्तर प्रदेशातील नोएडा येथील राहणारी त्विशा शर्मा आणि भोपाळमधील वकील समर्थ सिंग यांची ओळख २०२४ मध्ये एका डेटिंग ॲपद्वारे झाली होती. ओळखीचे रूपांतर प्रेमात झाल्यानंतर डिसेंबर २०२५ मध्ये दोघांनी मोठ्या थाटामाटात लग्न केले. लग्नानंतर त्विशा भोपाळला शिफ्ट झाली. मात्र, लग्नाचे सुरुवातीचे काही दिवस आनंदात गेल्यानंतर तिला सासरच्यांकडून मानसिक आणि शारीरिक छळ सहन करावा लागल्याचा आरोप तिच्या कुटुंबीयांनी केला आहे.

मैत्रिणीसोबतचे चॅट आणि वडिलांचे आरोप:
त्विशाच्या मृत्यूच्या पूर्वसंध्येला तिने आपल्या मैत्रिणीला पाठवलेले मेसेज सोशल मीडियावर समोर आले आहेत. "मी लग्नाच्या जाळ्यात अडकले आहे, तू अशी चूक करू नकोस", "मला इथून घेऊन जा, हे लोक मला जगू देणार नाहीत," अशा शब्दांत तिने आपल्या वेदना मांडल्या होत्या. त्विशाच्या वडिलांनी सांगितले की, मुलीच्या मृत्यूची बातमी मिळताच ते भोपाळला पोहोचले. तिचा मृतदेह पाहिल्यानंतर त्यांच्या पायाखालची जमीनच सरकली, कारण तिच्या शरीरावर जखमांच्या खुणा होत्या. तिचा हुंड्यासाठी मानसिक आणि शारीरिक छळ केला जात होता, असा थेट आरोप वडिलांनी केला आहे.

सासरच्या लोकांचे दावे आणि पोलीस तपास:
त्विशाची सासू, जी एक निवृत्त न्यायाधीश (Retired Judge) आहे, तिने हे आरोप फेटाळून लावले आहेत. जामीन अर्जात त्यांनी असा दावा केला आहे की, त्विशा मानसिक तणावाखाली होती आणि तिला अंमली पदार्थांचे (Drugs) व्यसन होते. मात्र, त्विशाच्या कुटुंबीयांनी हा दावा पूर्णपणे फेटाळला असून दिल्लीच्या एम्स (AIIMS) रुग्णालयात तिचे पुन्हा शवविच्छेदन (Postmortem) करण्याची मागणी केली आहे.

नुकत्याच समोर आलेल्या सीसीटीव्ही (CCTV) फुटेजमध्ये त्विशा घटनेच्या दिवशी सकाळी ७:२० वाजता गच्चीकडे एकटीच जाताना दिसत आहे. त्यानंतर काही वेळातच तिचे पती समर्थ सिंग आणि इतर काही जण तिला बेशुद्ध अवस्थेत पायऱ्यांवरून खाली आणताना दिसत आहेत. पोलिसांनी या प्रकरणी पती समर्थ सिंग आणि सासूविरुद्ध गुन्हा दाखल केला असून पुढील तपास सुरू आहे.