बारामतीत धक्कादायक जमीन घोटाळा; नाव बदलण्यासाठी चक्क बनवले 'बनावट गॅझेट', धाकट्या भावाची जमीन हडपली!

बारामती: बारामती तालुक्यातील करंजे येथे एका भावाने दुसऱ्या भावाची जमीन हडपण्यासाठी अत्यंत शक्कल लढवत सरकारी यंत्रणेचीच दिशाभूल केल्याचा धक्कादायक प्रकार उघडकीस आला आहे. स्वतःचे नाव 'बापूराव' असल्याचे भासवून, शासकीय राजपत्रामध्ये (गॅझेट) फेरफार करून नामदेव एकनाथ पिलाणे याने आपल्या धाकट्या भावाची तीन हेक्टरपेक्षा जास्त जमीन बळकावली आहे.

काय आहे प्रकरण? आरोपी नामदेव एकनाथ पिलाणे याने महसूल विभागातील काही अधिकाऱ्यांच्या निष्काळजीपणाचा फायदा घेत स्वतःची ओळख लपवून सरकारी गॅझेटमध्ये बदल केले. या बनावट कागदपत्रांच्या आधारे त्याने धाकट्या भावाच्या मालकीची असलेली तीन हेक्टरपेक्षा जास्त शेती आपल्या नावे करून घेतली. तलाठी आणि मंडळ अधिकाऱ्यांच्या पातळीवर झालेल्या या प्रक्रियेत पूर्णपणे दुर्लक्ष झाल्याचा ठपका ठेवण्यात येत आहे.

पोलीस कारवाई: हा प्रकार लक्षात आल्यानंतर फसवणूक झालेल्या भावाने तक्रार दाखल केली. या तक्रारीनंतर वडगाव निंबाळकर पोलिस ठाण्यात नामदेव एकनाथ पिलाणेवर फसवणुकीसह विविध कलमांखाली गुन्हा दाखल करण्यात आला आहे. सरकारी दस्तऐवजांमध्ये फेरफार करून फसवणूक केल्याने परिसरात खळबळ उडाली आहे.

महसूल यंत्रणेच्या भूमिकेवर प्रश्नचिन्ह: एवढी मोठी जमीन दुसऱ्याच्या नावे करताना महसूल विभागाकडून कोणतीही पडताळणी करण्यात आली नाही का? असा प्रश्न आता उपस्थित केला जात आहे. या संपूर्ण प्रकरणाची सखोल चौकशी करण्याची मागणी स्थानिकांकडून होत आहे