“I Lacked in PR & Marketing!” Bhumika Chawla Opens Up About Her 25-Year Bollywood Journey and Shortcomings!

'तेरे नाम' चित्रपटातील 'निर्जरा' या भूमिकेतून संपूर्ण देशाला आपल्या प्रेमात पाडणारी अभिनेत्री भूमिका चावला तुम्हाला आठवतेय का? आज तिला अचानक पाहिलं तर ओळखणंही कठीण होतं. सध्या ती काही मोजक्याच सिनेमांमध्ये छोट्या-मोठ्या भूमिकांमध्ये पाहायला मिळते.

'एम एस धोनी: द अनटोल्ड स्टोरी' या चित्रपटात तिने धोनीच्या बहिणीची भूमिका साकारली होती. नुकतंच भूमिकाने ग्लॅमर जगतापासून दूर राहण्यावर आणि तिच्या करिअरमधील चढ-उतारांवर जाहीर भाष्य केलं आहे. तिने स्पष्ट शब्दांत कबुली दिली की, "मी पीआर (PR) आणि मार्केटिंगमध्ये खूप कमी पडले."

भूमिका चावलाला नुकताच एका पुरस्काराने गौरविण्यात आले. या खास प्रसंगी तिने सोशल मीडियावर एक मोठी आणि भावूक पोस्ट शेअर केली. तिने आपले आई-वडील, चाहते आणि स्वतःचेही आभार मानत लिहिले, "२५ वर्ष... आणि कितीतरी वेगवेगळे अनुभव. जेव्हा मी वळून पाठीमागे पाहते, तेव्हा भूतकाळाच्या आरशात सगळं काही धूसर दिसतं... आणि तरीही, सर्व काही तितकंच स्पष्ट आहे..."

तिने पुढे लिहिले, "माझे सर्व दिग्दर्शक, निर्माते, सहकलाकार, संगीतकार, तंत्रज्ञ, डीओपी (DOP), लेखक, स्टायलिस्ट, सहाय्यक दिग्दर्शक आणि थोडक्यात सांगायचं तर या प्रवासातील संपूर्ण टीमचे मी मनापासून आभार मानते."

आईच्या त्या एका सल्ल्याने बदलले आयुष्य
आपल्या आईबद्दल कृतज्ञता व्यक्त करताना भूमिका म्हणाली, "थँक्यू आई! तू नेहमीच माझा खंबीर पाठींबा म्हणून माझ्यासोबत होतीस. आज मला जाणीव होतेय की तू किती शांत, प्रतिष्ठित आणि माझी खरी ताकद होतीस. माझ्या पहिल्या चित्रपटाच्या वेळी मला काहीच समजत नसल्यामुळे तिथून पळून जाण्याची इच्छा होत होती. तेव्हा त्या लहान मुलीला, 'आपण गोष्टींमधून पळ काढायचा नसतो, तर तिथे पाय रोवून उभं राहायचं असतं आणि ते काम पूर्ण करायचं असतं, त्यानंतरही जर तुला ते पुढे करायचं नसेल तर तू खुशाल सोडू शकतेस' हे समजावून सांगण्यासाठी तुझे खूप खूप आभार! थँक्यू पापा आणि थँक्यू माझा छोटा चॅम्पियन... मला इतक्या गोष्टींसाठी प्रेरित आणि प्रोत्साहित केल्याबद्दल."

"मी कोणाला खाली खेचले नाही..."
स्वतःच्या जुन्या रूपाशी संवाद साधताना भूमिका लिहिते, "थँक्यू भूमिका (ती लहान भूमिका), जिने या प्रवासाची सुरुवात केली आणि स्वतःचे निर्णय स्वतः घेत ती पुढे जात राहिली. ते निर्णय योग्य असतील किंवा चुकीचे, पण ते पूर्णपणे माझे स्वतःचे होते. कधीही हार न मानल्याबद्दल तुझे आभार... होय, तू कदाचित इतरांसारखी ठरावीक साच्यातली, खूप सुंदर नसशील, किंवा तुझ्या क्षेत्रातील सर्वोत्तम नसशील, पण तू तुझ्या कामाशी नेहमीच प्रामाणिक आणि समर्पित राहिलीस. स्वतः यशाची शिडी चढण्यासाठी तू कधीही कोणाला खाली खेचले नाहीस."

पीआर आणि मार्केटिंगमध्ये झाली चूक
आपल्या कमतरतेबद्दल उघडपणे बोलताना भूमिकाने मान्य केले की, "तू पीआर, मार्केटिंग आणि इतर अनेक गोष्टींमध्ये आणखी चांगली कामगिरी करू शकली असतीस.. असो, या कलेबद्दल, अभिनयाबद्दल आणि हा बिझनेस कसा चालतो याबद्दल अजूनही बरंच काही शिकणं आणि समजून घेणं बाकी आहे..."

शेवटी आपल्या चाहत्यांना आरोग्याचा सल्ला देत तिने लिहिले, "प्रिय मुली, तुला तुझ्या पुढील प्रवासासाठी खूप खूप शुभेच्छा. तुझ्या आरोग्याची आणि मनाच्या शांततेची काळजी घे. माझ्यावर इतकं भरभरून प्रेम करणाऱ्या माझ्या सर्व चाहत्यांचे आणि हितचिंतकांचे मनापासून आभार. तुम्हीही तुमच्या आरोग्याची आणि मनाच्या शांततेची काळजी घ्या, कारण शेवटी या जगात तीच सर्वात महत्त्वाची गोष्ट आहे. माझ्या या संपूर्ण प्रवासात नेहमी सोबत राहिल्याबद्दल माझे प्रिय कुटुंब आणि मित्रांचे खूप खूप आभार."