मधुचंद्राच्या रात्रीनंतर दुसऱ्याच दिवशी नवरदेवाने संपवले आयुष्य; नवरीसह ४ मित्रांवर गंभीर गुन्हा दाखल!

हरियाणाच्या पलवल जिल्ह्यातून एक काळजाचा थरकाप उडवणारी आणि संपूर्ण समाजमनाला चक्रावून सोडणारी धक्कादायक घटना समोर आली आहे. लग्न झाल्यानंतर ज्या घरात सनई-चौघड्यांचे सूर आणि आनंदाचे वातावरण असायला हवे होते, तिथे मधुचंद्राच्या (सुहागरात) रात्रीनंतर दुसऱ्याच दिवशी एका नवविवाहित नवरदेवाने रेल्वेगाडीसमोर उडी मारून आपले जीवन संपवले.

लग्नाच्या पहिल्याच रात्री पती-पत्नीत गंभीर वाद झाला होता, ज्यानंतर पत्नीच्या काही मित्रांनी नवऱ्याला फोनवरून ब्लॅकमेल आणि मानसिक छळ करण्यास सुरुवात केली होती, असा खळबळजनक आरोप मृतकाच्या भावाने केला आहे. या धक्कादायक घटनेच्या १६ दिवसांनंतर पोलिसांनी मृत ओमप्रकाश याची पत्नी आणि तिच्या चार मित्रांविरोधात आत्महत्येसाठी प्रवृत्त केल्याचा गुन्हा दाखल केला आहे.

२९ एप्रिलला थाटामाटात झाले होते लग्न
मिळालेल्या माहितीनुसार, मृत ओमप्रकाश (ओमी) याचे लग्न २९ एप्रिल रोजी भूमिका नावाच्या तरुणीशी अतिशय थाटामाटात पार पडले होते. लग्न पार पडल्यानंतर घरात आनंदाचे वातावरण होते. मात्र, २९ आणि ३० एप्रिलच्या दरम्यान असलेल्या पहिल्या रात्री (मधुचंद्राच्या रात्री) ओमप्रकाश आणि त्याची पत्नी भूमिका यांच्यात कोणत्यातरी कारणावरून जोरदार भांडण आणि वाद झाला.

१ मेच्या सकाळी चार नंबरवरून आले धमक्यांचे फोन!मृतकाचे भाऊ जय भगवान यांनी पोलिसांत दिलेल्या तक्रारीनुसार, सुहागरात्रीच्या दुसऱ्या दिवशी म्हणजेच १ मे रोजी सकाळी ७ वाजल्यापासून ओमप्रकाशच्या मोबाईलवर चार वेगवेगळ्या नंबरवरून सतत फोन येऊ लागले. फोन करणारे दुसरे तिसरे कोणी नसून नवरी भूमिका हिच्या जवळचे मित्र अजय निषाद, संजीव, नारायण सिंह आणि वेदराम हे होते. हे चौघेही ओमप्रकाशला फोन करून सातत्याने धमक्या देत होते, शिवीगाळ करत होते आणि मानसिक छळ करत होते.

घाबरलेल्या मुलाने वडिलांना सांगितली हकीकत
सतत येणाऱ्या या धमक्यांच्या फोनमुळे आणि मानसिक त्रासामुळे ओमप्रकाश आतून पूर्णपणे हादरला होता आणि प्रचंड मानसिक तणावाखाली आला होता. त्याने तात्काळ आपले वडील अशोक यांच्याकडे धाव घेतली आणि घडलेला सर्व प्रकार सांगितला की, "भूमिकाचे मित्र मला सतत फोन करून त्रास आणि धमक्या देत आहेत." वडिलांनी आपल्या मुलाला धीर देण्याचा आणि समजावण्याचा खूप प्रयत्न केला.

... अन् ओमीने रेल्वेसमोर घेतली उडी!
परंतु, आरोपींकडून होणारा छळ आणि धमक्यांचा पाऊस थांबत नसल्याने शेवटी हताश झालेल्या ओमप्रकाशने १ मे रोजी दुपारच्या सुमारास होडल रेल्वे स्टेशन गाठले. तिथे येणाऱ्या एका वेगवान ट्रेनसमोर त्याने थेट उडी मारली. ट्रेनची जोरदार धडक बसल्यामुळे त्याचा जागीच मृत्यू झाला.

या भयानक घटनेने दोन्ही कुटुंबात एकच खळबळ उडाली आहे. पोलिसांनी याप्रकरणी मृत ओमप्रकाशच्या भावाच्या तक्रारीवरून पत्नी भूमिका आणि तिचे मित्र अजय निषाद, संजीव, नारायण सिंह आणि वेदराम यांच्याविरुद्ध गुन्हा दाखल केला असून पुढील तपास सुरू केला आहे.