मुंबई: अर्जेंटिनावर दुहेरी संकट फॉकलैंड्स बॅनरप्रकरणी खेळाडूंवर प्रीमियर लीग बंदीचे सावट, फिफाकडूनही चौकशी सुरू

मुंबई: वर्ल्ड कप फुटबॉलच्या अंतिम सामन्यात पराभूत झालेल्या अर्जेटिना खेळाडूंच्या यातना थांबण्यास तयार नाहीत. इंग्लंडविरुद्धच्या विजयानंतर अर्जेटिनाच्या खेळाडूंनी 'माल्विनास' (फॉकलैंड्ससाठी अर्जेटिनातील शब्द) आमचेच अशा अर्थाचा फलक फडकावला होता. त्यामुळे त्यांच्यावर प्रीमियर लीग बंदीचे सावट आले आहे. त्याच वेळी अर्जेटिनाच्या खेळाडूंनी अंतिम सामन्यानंतर केलेल्या गोंधळाचीही फिफाच्या शिस्तपालन समितीने चौकशी प्रक्रिया सुरू केली आहे.

फॉकलैंड्सबाबतचा फलक फडकावण्यात लिसांद्रो मार्टिनेझ (मँचेस्टर युनायटेड), एंझो फर्नांडीस (चेल्सी), खिस्तियन रोमेरो (टॉटनहॅम हॉट्सपूर) हे आघाडीवर होते. या संघातील अनेक खेळाडू प्रीमियर लीगसाठी करारबद्ध आहेत. त्यांनी फलक झळकावल्यावर त्याचे तीव्र प्रतिसाद इंग्लंडमध्ये उमटले होते. त्यातील काहींनी अर्जेटिनाच्या खेळाडूंचा प्रीमियर लीगसाठी आवश्यक असलेला वर्क व्हिसा रद्द करण्याची मागणी केली आहे.

 

आर्थिक अडथळा
प्रीमियर लीग बंदीचा निर्णय सोपा ठरणार नाही. लिसांद्रो मार्टिनेझ, खिस्तियन रोमेरो, मार्कोस सेनेसी, एंझो फर्नांडीस, अॅलेक्सी मॅक अॅलीस्टर हे प्रीमियर लीगमधील महागडे खेळाडू आहेत. ते एकूण २ कोटी ३० लाख पौंड कराचा भरणा प्रतिवर्षी करतात. फॉकलैंड्सवरील तावा राखण्यासाठीच्या एकूण खर्चाच्या ही रक्कम ३३ टक्के आहे, याकडे लक्ष वेधले जात आहे.

अर्जेंटिनाच्या खेळाडूंना वाद भोवणार?
अर्जेंटिना खेळाडूंनी अंतिम सामन्यानंतर केलेल्या वर्तनाची चौकशी 'फिफा'कडून सुरू झाल्यामुळे अर्जेंटिना संघ तसेच त्यातील खेळाडूंवर मोठ्या कारवाईची शक्यता आहे. फिफाच्या शिस्तपालन समितीने घेतलेल्या निर्णयाची जागतिक स्तरावर अंमलबजावणी होते. त्यामुळे अर्जेंटिना खेळाडूंवर कठोर कारवाईचे संकट ओढवले आहे. स्पेन फुटबॉल महासंघाचे अध्यक्ष लुईस रुआलेस यांनी स्पेन महिला संघातील खेळाडूचे चुंबन घेतल्यामुळे त्यांच्यावर तीन वर्षांची बंदी घालण्यात आली होती, तर इटलीचा बचावपटू जॉर्जिओ चिएलिनी याला खांद्याला चावल्यामुळे उरुग्वेच्या लुईस सुआरेझवर चार महिन्यांची बंदी घालण्यात आली होती. अंतिम सामन्यानंतरच्या गोंधलाबद्दल अर्जेंटिना संघातील ४ खेळाडू प्रामुख्याने चौकशीच्या फेऱ्यात येऊ शकतील. ही कारवाई करताना अर्जेंटिनाच्या संघाकडून यापूर्वी झालेले अवमानही लक्षात घेतले जाण्याची शक्यता आहे.

पराभवाच्या जखमा खोलवर: मेस्सी
'वर्ल्ड कप अंतिम सामन्यातील पराभव कमालीचा वेदनादायक आहे. या जखमा लवकर भरून निघणार नाहीत,' असे लिओनेल मेस्सीने सांगितले. त्याने समाजमाध्यमांवर आपल्या भावना व्यक्त केल्या आहेत. या स्पर्धेत अर्जेंटिना संघाला देशवासियांनी दिलेला पाठिंबा आणि आमची कामगिरी आम्ही कधीही विसरू शकणार नाही. आम्ही अभिमानास्पद कामगिरी केली याचे समाधान आहे, असे मेस्सीने नमूद केले आहे. त्याने या वेळी विजेत्या स्पेन संघाचेही आवर्जून अभिनंदन केले आहे.