नागपूर: भरचौकात मारहाण करून युवकांचे अपहरण; पोलिसांच्या 'सिनेस्टाइल ॲक्शन'मुळे आरोपींची पळापळ

नागपूर: एमआयडीसीतील गजबजलेल्या चौकात सायंकाळी अचानक एकच गोंधळ उडाला. आठ ते दहा जणांचे टोळके दोन युवकांवर अचानक तुटून पडले आणि भररस्त्यात त्यांना बेदम मारहाण करू लागले. या थरारक घटनेदरम्यान टोळक्यातील एका आरोपीने कंबरेला खोचलेली संशयास्पद वस्तू बाहेर काढण्याचा वारंवार प्रयत्न केला. ते पाहून मारहाण सहन करणाऱ्या युवकांच्याच नव्हे, तर घटनास्थळी उभ्या असलेल्या नागरिकांच्याही काळजाचा ठोका चुकला. मात्र, समोरच सीसीटीव्ही कॅमेरे असल्याचे लक्षात येताच आरोपीच्या साथीदाराने त्याला रोखले, ज्यामुळे मोठा अनर्थ टळला. चौकात वाढणारी गर्दी पाहून आरोपींनी त्या जखमी युवकांना बळजबरीने एका ऑटोत कोंबले आणि वेगाने तिथून पसार झाले. या घटनेमुळे काहीतरी भयंकर घडणार याची कल्पना आल्याने अनेकजण प्रचंड शहारले होते.

मात्र, एका 'अज्ञात हिरो'ने अत्यंत सजग नागरिकाचे कर्तव्य पार पाडले आणि काही वेळेतच चोहोबाजूने पोलिसांच्या गाड्या घटनास्थळांकडे धावल्या. हे पोलिसांचे चित्रपटाला शोभेल असे सिनेस्टाइल धाडस पाहून आरोपी त्या जखमी तरुणांना तिथेच सोडून पळून गेले. एखाद्या चित्रपटातील दृश्यासारखा हा घटनाक्रम शुक्रवारी सायंकाळी ४ ते ५ च्या सुमारास एमआयडीसी पोलिसांच्या हद्दीत घडला. प्रत्यक्षदर्शींनी दिलेल्या माहितीनुसार, पीडित तरुणांची नावे अभय आणि राजा अशी आहेत. महिनाभरापूर्वी एका कुख्यात गुन्हेगारासोबत या दोघांचे भांडण झाले होते, ज्याची खुन्नस मनात ठेवून आज या गुन्हेगाराच्या टोळीने एमआयडीसीतील चौकात त्यांना घेरले आणि लाथाबुक्क्यांनी बेदम मारहाण केली. सलग पावसामुळे आधीच वातावरण अंधारलेले होते, त्यात या थरारक घटनेने वातावरण आणखीनच गंभीर झाले.

अनेक आरोपी दारूच्या नशेत धिंगाणा घाजत असल्याने त्यांची देहबोली पाहून ते या दोघांसोबत काहीही करू शकतील, अशी भीती गर्दीतील अनेकांना वाटत होती. मात्र, त्यांना रोखण्याचे धाडस कुणीच दाखवले नाही. दरम्यान, घटनास्थळी सीसीटीव्ही असल्याने आणि गर्दी वाढत असल्याने आरोपींनी या दोन्ही तरुणांना उचलून ऑटोत कोंबले. काही आरोपी ऑटोत बसले तर काही इतर वाहनांनी सुसाट वेगाने शांतीनगरातील एका भंगाराच्या गोदामाकडे निघून गेले. मोठा गुन्हा घडणार असल्याची कुणकुण लागताच गर्दीतील एका सजग नागरिकाने तातडीने पोलिसांना याची गोपनीय माहिती दिली.

ही माहिती वरिष्ठांच्या कानावर जाताच अतिरिक्त विनिता साहू, गुन्हे शाखेचे उपायुक्त दीपक अग्रवाल, झोन १ चे डीसीपी ऋषिकेश सिंगारेड्डी आदी अधिकारी लगेच ॲक्शन मोडवर आले. त्यांनी कंट्रोल रूमच्या माध्यमातून एमआयडीसी तसेच आजूबाजूच्या ठाण्यातील पोलिसांना तातडीने घटनास्थळी पोहोचण्याचे कडक आदेश दिले. एकाच वेळी अनेक वरिष्ठ अधिकाऱ्यांचे फोन खणखणल्याने पोलिसांची अनेक वाहने त्या भंगाराच्या गोदामाकडे सुसाट धावली. पोलिसांचा हा मोठा फौजफाटा आणि 'सिनेस्टाइल ॲक्शन' पाहून गुन्हेगारांचे ते टोळके भयभीत झाले आणि तिथून सटकले.

या प्रकरणाची नोंद पोलिसांकडे झाली असली, तरी जखमी तरुण पोलिस ठाण्यात पोहोचले असता त्यांना रात्रीपर्यंत ताटकळत बसवून ठेवण्यात आल्याची माहिती समोर आली आहे. त्यामुळे या प्रकरणात रात्री उशिरापर्यंत अधिकृत गुन्हा दाखल झाला नव्हता. मारहाण आणि अपहरणाचा हा संतापजनक प्रकार एका स्थानिक भंगारवाल्याने आपल्या साथीदारांच्या मदतीने केल्याची प्राथमिक माहिती आहे. या संपूर्ण प्रकरणात दोषींवर अत्यंत कडक कायदेशीर कारवाई करण्यात येणार असल्याची माहिती एमआयडीसीचे वरिष्ठ पोलीस निरीक्षक गोकुळ महाजन यांनी लोकमतशी बोलताना दिली आहे.

Disclaimer: या पोस्टमधील माहिती उपलब्ध वृत्तस्रोत व अधिकृत माहितीनुसार प्रकाशित करण्यात आली आहे. तपास किंवा अधिकृत प्रक्रियेनुसार तथ्यांमध्ये बदल होऊ शकतो.
या पोस्टचा उद्देश केवळ माहिती देणे असून अंतिम सत्यता संबंधित शासकीय यंत्रणा व न्यायालयीन प्रक्रियेवर अवलंबून आहे.