बुलढाणा: शेतकऱ्यांच्या न्याय हक्कासाठी बुलढाण्यात महामोर्चा; हेक्टरी १ लाखांच्या मदतीसह विविध मागण्यांसाठी ठाकरे सेना आक्रमक

बुलढाणा: शिवसेना (उद्धव बाळासाहेब ठाकरे) पक्षाच्या वतीने बुलढाणा जिल्ह्यातील गंभीर समस्या, कोरडा दुष्काळ आणि शेतकऱ्यांच्या विविध प्रलंबित न्याय्य मागण्यांसाठी जिल्हाधिकारी कार्यालय बुलढाणा येथे एक भव्य आणि धडाकेबाज शेतकरी आक्रोश मोर्चा काढण्यात आला. यंदाच्या प्रतिकूल हवामानामुळे व अपुऱ्या पावसामुळे शेतकरी वर्ग मोठ्या आर्थिक संकटात सापडला असून, शासनाने तातडीने दखल घेऊन मदत करावी, या मुख्य उद्देशाने हा मोर्चा काढण्यात आला.

खासदार अरविंद सावंत यांच्या प्रमुख उपस्थितीत आणि मेहकर-लोणार विधानसभा मतदारसंघाचे आमदार सिद्धार्थ खरात यांच्या नेतृत्वाखाली काढण्यात आलेल्या या मोर्चानंतर हजारो शिवसैनिक, शेतकरी आणि पक्षाचे पदाधिकारी रस्त्यावर उतरले. मेहकर, लोणार, सिंदखेडराजा, देऊळगाव राजा यांसह जिल्ह्यातील विविध तालुक्यांमधून आणि गावोगावहून मोठ्या संख्येने शेतकरी या ऐतिहासिक मोर्चान्मध्ये सहभागी झाले होते. बैलगाड्या, ट्रॅक्टर, महिला शेतकरी आणि युवक शेतकऱ्यांचा मोठा सहभाग हे या मोर्चाचे सर्वात मोठे आणि विशेष आकर्षण ठरले.

मोर्चातील प्रमुख मागण्या आणि निवेदनातील मुद्दे: जिल्हधिकाऱ्यांना देण्यात आलेल्या निवेदनामध्ये शेतकऱ्यांच्या हिवाळयातील व दुष्काळी परिस्थितीशी संबंधित अनेक ज्वलंत मुंडे मांडण्यात आले आहेत:

• हेक्टरी १ लाख मदत: शेतकऱ्यांना सरसकट हेक्टरी १ लाख रुपयांची आर्थिक मदत तात्काळ देण्यात यावी.

• थकीत पीकविमा: मागील वर्षाची थकीत पीकविमा रक्कम विनाविलंब शेतकऱ्यांच्या खात्यात जमा करण्यात यावी.

• वीजपुरवठा व स्मार्ट मीटर: शेतीसाठी पूर्ण क्षमतेने आणि सुरळीत वीजपुरवठा करण्यात यावा, तसेच शेतीवर स्मार्ट मीटर बसवण्याची सक्ती तातडीने थांबवावी.

• कर्जमाफी व अनुदान: कर्जमाफीच्या उर्वरित याद्या लवकरात लवकर जाहीर कराव्यात आणि नियमितपणे कर्जफेड करणाऱ्या शेतकऱ्यांना २ लाख रुपयांचे प्रोत्साहनपर अनुदान देण्यात यावे.

• इतर मागण्या: विद्यार्थ्यांची शैक्षणिक फी माफ करण्यात यावी, पशुधनासाठी तातडीने चारा छावण्या सुरू कराव्यात, प्रधानमंत्री किसान सन्मान निधीच्या रकमेत वाढ करावी आणि अतिवृष्टीमुळे नुकसान झालेल्या शेतजमिनींसाठी तातडीने पंचनामे न करता थेट मदत जाहीर करावी.

दिग्गजांची उपस्थिती आणि सरकारला कडक इशारा: या आंदोलनाला खासदार अरविंद सावंत, आमदार नितीन बापू देशमुख, जिल्हा संपर्कप्रमुख नरेंद्र खेडेकर यांच्यासह पक्षाचे अनेक ज्येष्ठ नेते व पदाधिकारी उपस्थित होते. तसेच प्रवक्त्या जयशीताई शेळके, जिल्हाप्रमुख जालिंदर बुधवत, नगराध्यक्ष किशोर गारोळे, उपजिल्हाप्रमुख प्रा. आशिष राहते यांच्यासह शिवसेना, युवासेना आणि विविध अंगीकृत संघटनांचे कार्यकर्ते मोठ्या संख्येने सहभागी झाले होते.

यावेळी बोलताना नेत्यांनी राज्य सरकारवर जोरदार निशाणा साधला. जर शासनाने शेतकऱ्यांच्या मागण्या येत्या काही दिवसांत पूर्ण केल्या नाहीत, तर तीव्र लढा उभारला जाईल आणि प्रसंगी समृद्धी महामार्ग जाम केला जाईल, असा सज्जड इशारा आयोजकांकडून देण्यात आला आहे. "शेतकऱ्यांच्या प्रश्नांवर संघर्ष सुरूच राहील, शेतकऱ्यांच्या न्याय हक्कासाठी एक पाऊल पुढे!" असा दृढ निर्धार यावेळी हजारो शेतकऱ्यांच्या उपस्थितीत व्यक्त करण्यात आला.