मुंबई: ब्रेकऐवजी एक्सिलरेटर दाबला अन् होत्याचे नव्हते झाले; महिलेसह २ वर्षांच्या चिमुकल्याचा मृत्यू

मुंबई: मुलुंड परिसरात एका भीषण अपघाताची घटना घडली आहे, जिथे ब्रेकऐवजी एक्सिलरेटर दाबल्यामुळे एका महिलेचा आणि दोन वर्षांच्या बालकाचा दुर्दैवी मृत्यू झाला आहे.

मुलुंड (पश्चिम) येथील 'निर्मल सिटी ऑफ जॉय' गृहनिर्माण सोसायटीच्या बाहेर गुरुवारी संध्याकाळी ही हृदयद्रावक घटना घडली. ७४ वर्षीय मोहन शेषाद्री हे आपली कार सोसायटीतून बाहेर काढत होते.
त्याच वेळी समोरून एक टेम्पो येत असल्याचे पाहून गोंधळलेल्या अवस्थेत त्यांनी ब्रेकऐवजी चुकून एक्सिलरेटर जोरात दाबला. यामुळे कारचा वेग अचानक वाढला आणि ती थेट रस्त्याच्या कडेला भाजी विकणाऱ्या स्टॉलवर जाऊन धडकली.

या भीषण धडकेत ४४ वर्षीय नियती राजीव शहा आणि पूजा रायिया (३०) या दोन महिला जखमी झाल्या. त्यांना तातडीने मुलुंड जनरल हॉस्पिटलमध्ये नेण्यात आले, जिथे उपचारादरम्यान नियती शहा यांचा मृत्यू झाला. याच अपघातात पूजा रायिया यांचा दोन वर्षांचा मुलगा 'राधे' याच्या डोक्याला गंभीर दुखापत झाली होती.
त्याला फोर्टिस रुग्णालयात हलवण्यात आले होते, मात्र उपचारादरम्यान त्याचाही मृत्यू झाला. पूजा रायिया यांच्यावर अद्याप उपचार सुरू आहेत. मुलुंड पोलिसांनी आरोपी वाहनचालकावर निष्काळजीपणा आणि भरधाव वेगाने गाडी चालवल्याप्रकरणी गुन्हा दाखल केला आहे.