अमरावती: प्रॅक्टिकल लिहून देण्यास नकार दिल्याने कॉलेजच्या पायऱ्यांवरच १९ वर्षीय तरुणीच्या गळ्यावर चाकूने जीवघेणे वार!

अमरावती: बडनेरा पोलिस ठाण्याच्या हद्दीतील इन्स्टिट्यूट ऑफ फार्मसी अॅड रिसर्च, बडनेरा येथील पायऱ्यांवरच मंगळवारी दुपारी सव्वा बाराच्या सुमारास एका तरुणाने १९ वर्षीय वर्गमैत्रिणीच्या गळ्यावर चाकूने निर्दयीपणे जीवघेणे वार केले. गंभीर जखमी तरुणीचे नाव प्राप्ती आहे. याप्रकरणी बडनेरा पोलिसांनी आरोपी नवीन मेघराज वानवाणी (१९, रा. सिंधी कॅम्प, बडनेरा) याच्याविरुद्ध खुनाच्या प्रयत्नाचा गुन्हा दाखल केला. त्याला अटक करण्यात आली आहे.

सूत्रांनुसार, प्राप्ती व नवीन हे एकाच महाविद्यालयात शिकतात. मंगळवारी दुपारी १२ च्या सुमारास प्रॅक्टिकल संपवून प्राप्ती ही क्लासच्या बाहेर येत असताना नवीनने तिला महाविद्यालयाच्या पायऱ्यांवरच मागोमाग गाठले.

भावाने दिली फिर्याद
याप्रकरणी प्राप्तीच्या भावाने बडनेरा पोलिसांत तक्रार नोंदविली. त्या तक्रारीनुसार, नवीनने प्राप्तीला प्रॅक्टिकल लिहून मागितले होते. त्यावर तिने नकार दिल्याने त्याने तिच्यावर जीवघेणा हल्ला केल्याचे म्हटले आहे.

ती जोराने ओरडली...
बॅगमध्ये आणलेल्या चाकूने त्याने तिच्या मानेवर दोन वार केले. ती जिवाच्या आकांताने ओरडल्याने पसार होण्याच्या प्रयत्नात असलेल्या आरोपीला चौकीदार व विद्यार्थ्यांनी पकडले. सद्या तिची प्रकृती धोक्याबाहेर आहे.

विद्यार्थ्यांनी दाखवले धाडस; आरोपी पोलिसांच्या ताब्यात

कॉलेजच्या वर्गाबाहेर आणि लॉबीमध्ये घडलेल्या या भीषण प्रकाराकडे सुरुवातीला काही क्षण कोणाला काय करावे सुचले नाही. परंतु, महाविद्यालयीन इतर विद्यार्थ्यांनी आणि सुरक्षा रक्षकांनी कमालीचे धाडस दाखवत तातडीने धाव घेतली. जिवाच्या आकांताने ओरडणाऱ्या तरुणीला वाचवण्यासाठी विद्यार्थ्यांनी आरोपी तरुणाला घटनास्थळावरच कॉलर पकडून रंगेहात पकडले. संतप्त विद्यार्थी व नागरिकांनी आरोपीला चांगलाच चोप दिला आणि त्यानंतर त्याला पोलिसांच्या हवाले करण्यात आले.

घटनेची माहिती मिळताच बडनेरा पोलीस स्टेशनचे अधिकारी आणि मोबाईल फॉरेन्सिक पथक तात्काळ घटनास्थळी दाखल झाले. पोलिसांनी घटनास्थळावरून रक्ताने माखलेला चाकू जप्त केला असून आरोपी नवीन वनवाणी याला ताब्यात घेण्यात आले आहे. दुसरीकडे, गंभीर जखमी झालेल्या १९ वर्षीय विद्यार्थिनीला तातडीने उपचारासाठी अमरावती येथील खासगी रुग्णालयातील (RIMS Hospital) अतिदक्षता विभागात (ICU) दाखल करण्यात आले आहे. डॉक्टरांच्या पथकाकडून तिच्यावर अपोश उपचार सुरू असून तिची प्रकृती चिंताजनक असल्याचे समजते. या घटनेमुळे शिक्षण संस्थांमधील विद्यार्थ्यांच्या सुरक्षेचा प्रश्न पुन्हा एकदा अत्यंत गंभीर स्वरूपात समोर आला आहे.