मुंबई: ठाण्यातील ॲमेझॉन एआय डेटा सेंटर आणि रिंग मेट्रो प्रकल्पांचा फेरविचार करा; आदित्य ठाकरेंचे मुख्यमंत्र्यांना पत्र

मुंबई: ठाण्यातील प्रस्तावित ॲमेझॉन एआय डेटा सेंटरसह रिंग मेट्रो आणि पॉड ट्रान्सपोर्ट प्रकल्पांच्या पर्यावरणीय व नागरी परिणामांचा फेरविचार करण्याची आक्रमक मागणी उद्धवसेनेचे आमदार आदित्य ठाकरे यांनी केली आहे. याबाबत त्यांनी मुख्यमंत्री देवेंद्र फडणवीस यांना अधिकृत पत्र पाठवून या प्रकल्पांबाबत स्वतंत्र पर्यावरणीय व पायाभूत सुविधांचा आढावा घेण्याची तसेच सर्वसामान्य नागरिकांच्या सहभागातून पूर्णपणे पारदर्शक प्रक्रिया राबविण्याची आग्रही मागणी केली आहे.

ठाणे शहराच्या पर्यावरणीय संतुलन, नागरी रचना आणि स्थानिक पायाभूत सुविधांवर दीर्घकालीन व दूरगामी परिणाम करणारे अनेक प्रकल्प सध्या प्रस्तावित आहेत. त्यामुळे या प्रकल्पांची निविदा प्रक्रिया किंवा पुढील कामे घाईघाईने पुढे नेण्यापूर्वी त्यांचे सर्वंकष व सखोल मूल्यमापन होणे अत्यंत आवश्यक असल्याचे आदित्य ठाकरे यांनी आपल्या पत्रात स्पष्टपणे नमूद केले आहे.

डेटा सेंटरवर नेमके आक्षेप काय? ठाण्यातील बाळकूम येथे प्रस्तावित करण्यात आलेल्या ॲमेझॉन एआय डेटा सेंटरमुळे शहराच्या पाणीपुरवठा, वीज जोडण्या, रस्ते वाहतूक, ध्वनी प्रदूषण, वाढणारी उष्णता, पर्यावरण आणि थेट सार्वजनिक आरोग्यावर होणाऱ्या संभाव्य दुष्परिणामांचा स्वतंत्रपणे अभ्यास करण्याची मागणी त्यांनी केली आहे. ठाणे शहरावर यापूर्वीच पिण्याच्या पाण्याचा, वाहतूक कोंडीचा आणि इतर पायाभूत सुविधांचा कमालीचा ताण आहे. त्यामुळे अशाप्रकारच्या मोठ्या डेटा सेंटरसाठी ज्याठिकाणी पर्यावरणीय व पायाभूत सुविधा अधिक सक्षम असतील, अशा एखाद्या योग्य पर्यायी ठिकाणाचा गांभीर्याने विचार करावा, असे ठाकरे यांनी सुचवले आहे.

सुमारे ५ हजार झाडांवर आणि पर्यावरणावर संकट? प्रस्तावित रिंग मेट्रो आणि पॉड ट्रान्सपोर्ट प्रकल्पांच्या मार्गात येणारी सुमारे पाच हजार झाडे, महत्त्वाचे कांदळवन (मॅग्रोव्ह्ज) आणि एकूणच परिसंस्थेवर होणाऱ्या संभाव्य परिणामांची स्वतंत्र व निष्पक्ष तपासणी करण्याची मागणीही या पत्रात करण्यात आली आहे. सार्वजनिक वाहतूक व्यवस्थेला आमचा कोणताही विरोध नाही, मात्र पर्यावरणाची अपरिमित हानी टाळून अधिक परिणामकारक आणि शाश्वत वाहतूक नियोजन करण्याची गरज असल्याचे त्यांनी अधोरेखित केले आहे.

याशिवाय, आधीच रेंगाळलेले मेट्रो-४ आणि मेट्रो-५ हे महत्त्वाचे प्रकल्प प्राधान्याने वेळेत पूर्ण करून सध्याची सार्वजनिक वाहतूक व्यवस्था अधिक सक्षम केली पाहिजे. त्यानंतरच अतिरिक्त वाहतूक प्रकल्पांची नेमकी गरज किती आहे आणि त्याचे पर्यावरणीय परिणाम काय असतील, याचा फेरविचार करावा, अशी स्पष्ट राजकीय व नागरी भूमिका आदित्य ठाकरे यांनी मांडली आहे.

नागरिकांची मते आणि हरकती जाणून घेण्याची मागणी या सर्व महत्त्वाच्या प्रकल्पांबाबत स्थानिक नागरिकांच्या हरकती, सूचना आणि मते जाणून घेण्यासाठी पूर्णपणे पारदर्शक सार्वजनिक सुनावणी किंवा प्रक्रिया राबवावी, जेणेकरून ठाणेकरांच्या हिताचे रक्षण होईल, अशी मागणीही पत्राच्या शेवटी करण्यात आली आहे.