Pune : सातारा–पुणे प्रवासाला वेग; दुहेरी बोगदा आणि दरी पूल तयार, ४५ मिनिटांचा प्रवास अवघ्या १० मिनिटांत, नवा मार्ग कुठून-कसा?

Pune : खंबाटकी घाटात ‘एस’ आकाराच्या धोकादायक वळणाच्या घाट रस्त्याला पर्याय म्हणून नवे प्रत्येकी तीन पदरी दोन बोगदे अस्तित्वात आले आहेत. सहा वर्षांपासून या बोगद्यांचे काम सुरू असून, ते 90 टक्क्यांपर्यंत पूर्ण झाले आहे. आता साताऱ्याहून पुण्याकडे येण्यासाठीचा एक बोगदा शनिवारपासून वाहतुकीसाठी खुला करण्यात आला आहे. बोगद्याच्या उताराला असलेल्या दरीपुलाचे काम बाकी असल्याने प्रायोगिक तत्त्वावर हलक्या वाहनांसाठी वाहतूक सुरू करण्यात आली आहे. यामुळे सुमारे 20 ते 25 मिनिटांचे अंतर वाचणार आहे.

पुणे-सातारा मार्गावर धोकादायक एस आकाराचा घाट रस्ता
पुणे-सातारा महामार्गावरील खंबाटकी घाटात धोकादायक ‘एस’ आकाराचा तीव्र उताराच्या वळणाचा घाट रस्ता होता. घाट रस्त्यावर अपघाताचे प्रमाण वाढले होते. सध्याचा पुणे-सातारा रस्ता घाटातून जात असल्याने काही ठिकाणी दुहेरी लेनचा रस्ता आहे. त्यामुळे वाहतुकीचा वेग कमी होतो. विशेषतः वीकएंड आणि सुट्ट्यांवेळी वारंवार वाहतूक कोंडी होते. त्यामुळे घाट रस्त्याला पर्यायी मार्गाचा विचार सुरू झाला. यामुळे भारतीय राष्ट्रीय महामार्ग प्राधिकरणाने (एनएचएआय) धोकादायक वळण काढून टाकण्यासाठी दोन नव्या बोगद्यांच्या रस्त्याच्या निर्मितीला मान्यता दिली.

Solapur Accident : पुणे–सोलापूर महामार्गावर भीषण अपघात; कारच्या धडकेत ५ जणांचा जागीच मृत्यू, परिसरात हळहळ

फेब्रुवारी 2019 मध्ये मान्यता दिल्यानंतर त्याच्या कामांना सुरुवात झाली. मात्र, करोनाच्या संसर्गात हे काम सुरू असले तरी त्याला फारशी गती प्राप्त झाली नव्हती. काम काही काळ रखडले होते. खंबाटकी घाटात प्रत्येकी तीन लेनचे दोन बोगदे साकारण्यासाठी तीन वर्षांची मुदत होती. येत्या मार्च 2026 पर्यंत त्याला मुदतवाढ मिळाली आहे.

कसा आहे नवा मार्ग?
खंबाटकीतील नवीन रस्ता हा सुमारे 6.46 किलोमीटर लांबीचा आहे. डाव्या बाजूस 1307 मीटर लांबीचा आणि उजव्या बाजूस 1224 मीटर लांबीचा तीन पदरी दुहेरी बोगदा आहे; तसेच डाव्या बाजूस 1104 मीटर आणि उजव्या बाजूस 930 मीटर लांबीचा व्हायाडक्ट उभारण्यात येत आहे. पुण्याच्या बाजूकडे बोगदा संपल्यानंतर कॅनॉलपर्यंत दरी पूल उभारण्यात येत आहे. त्याचे 15 टक्के काम बाकी आहे.