इसिसला सर्वात मोठा धक्का! जगातील अव्वल दहशतवादी अबु-बिलाल अल-मिणुकीचा खात्मा; डोनाल्ड ट्रम्प यांची मोठी घोषणा

वॉशिंग्टन / अबुजा: जागतिक दहशतवादाविरुद्धच्या लढ्यात अमेरिका आणि नायजेरियाच्या लष्कराला एक अतिशय मोठे आणि ऐतिहासिक यश आले आहे. क्रूर दहशतवादी संघटना 'इस्लामिक स्टेट' (ISIS) चा जगातील दुसऱ्या क्रमांकाचा सर्वोच्च कमांडर अबु-बिलाल अल-मिणुकी (Abu-Bilal al-Minuki) याला एका अत्यंत गुंतागुंतीच्या आणि अचूक लष्करी कारवाईत ठार करण्यात आले आहे. अमेरिकेचे अध्यक्ष डोनाल्ड ट्रम्प यांनी 'ट्रुथ सोशल' (Truth Social) या सोशल मीडिया प्लॅटफॉर्मवर पोस्ट करत या यशस्वी कारवाईची अधिकृत घोषणा केली.

अध्यक्ष ट्रम्प यांनी दिलेल्या माहितीनुसार, हा संयुक्त लष्करी रणसंग्राम अमेरिकन कमांडोज आणि नायजेरियन सशस्त्र दलांनी मिळून अत्यंत नियोजनबद्ध पद्धतीने पार पाडला. अल-मिणुकी हा जगभरातील सर्वात सक्रिय आणि धोकादायक दहशतवाद्यांपैकी एक मानला जात होता. तो आफ्रिका खंडातील दुर्गम भागात लपून आपली
दहशतवादी नेटवर्क चालवत होता आणि त्याला वाटले होते की तो तिथे सुरक्षित राहील. परंतु, गुप्तचर यंत्रणांच्या अचूक माहितीच्या आधारे सुरक्षा दलांनी त्याला शोधून काढले आणि रणांगणावरच त्याचा कायमचा गेम ओव्हर केला.

अबु-बिलाल अल-मिणुकी (ज्याला 'अबुबाकर मैनॉक' या नावानेही ओळखले जायचे) याला २०२३ मध्ये अमेरिकेने 'जागतिक दहशतवादी' म्हणून घोषित केले होते. आफ्रिकेत निष्पाप नागरिकांवर विशेषतः ख्रिश्चन समुदायावर झालेल्या अनेक भीषण हल्ल्यांमागे आणि अमेरिकन नागरिकांना लक्ष्य करणाऱ्या कट-कारस्थानांमागे त्याचा मुख्य हात होता.
डोनाल्ड ट्रम्प यांनी या धाडसी कामगिरीबद्दल अमेरिकन सैनिकांचे कौतुक केले असून, या मोहिमेत महत्त्वपूर्ण सहकार्य केल्याबद्दल नायजेरिया सरकारचे विशेष आभार मानले आहेत. अल-मिणुकीच्या खात्म्यामुळे इसिसच्या जागतिक कारवायांना आणि त्यांच्या नेटवर्कला जबरदस्त फटका बसला असून, त्यांची ताकद कमालीची क्षीण झाली आहे.