भंडारा: पेपर लीक प्रकरणांच्या निषेधार्थ 'सीजेपी'चे जोरदार आंदोलन; शेकडो युवकांचा सहभाग घेत केंद्र-राज्य सरकारविरोधी घोषणाबाजी

भंडारा: देशभरात सतत समोर येत असलेल्या आणि विद्यार्थ्यांच्या भविष्याशी खेळणाऱ्या पेपर लीक प्रकरणांच्या तीव्र निषेधार्थ कॉकरोच जनता पार्टी (CJP), भंडारा यांच्या वतीने जिल्हाधिकारी कार्यालयासमोर २० जुलै रोजी एक अत्यंत आक्रमक व तीव्र आंदोलन छेडण्यात आले. या आंदोलनात भंडारा जिल्ह्यातील शेकडोच्या संख्येने तरुण, विद्यार्थी आणि कार्यकर्ते मोठ्या उत्साहात व संतापात सहभागी झाले होते.

देशभर गाजत असलेल्या पेपर फुटीच्या घटनांमुळे लाखो होतकरू विद्यार्थ्यांचे भविष्य अंधारात जात असून, प्रशासकीय यंत्रणेच्या व शासनाच्या या ढिसाळ कारभाराविरुद्ध तरुणांमध्ये प्रचंड संतापाची लाट उसळली आहे. या पार्श्वभूमीवर भंडारा येथील जिल्हाधिकारी कार्यालयावर धडक देत निदर्शने करण्यात आली. आंदोलनादरम्यान उपस्थित तरुणांनी केंद्र व राज्य सरकारविरोधात जोरदार घोषणाबाजी करत परिसर दणाणून सोडला. विद्यार्थ्यांच्या आयुष्याशी खेळणाऱ्या दोषींवर कठोर कारवाई करण्यात यावी आणि पारदर्शक परीक्षा प्रणाली लागू करण्यात यावी, अशी आक्रमक मागणी यावेळी आंदोलकांकडून करण्यात आली.

यावेळी बोलताना CJP च्या पदाधिकाऱ्यांनी सांगितले की, वारंवार पेपर लीक होणे ही अत्यंत लाजीरवाणी बाब असून यामुळे मेहनती विद्यार्थ्यांच्या आत्मविश्वासाला तडा जात आहे. जोपर्यंत दोषींना कडक शिक्षा मिळत नाही आणि शिक्षण व्यवस्थेत सुधारणा होत नाही, तोपर्यंत आमचा हा लढा असाच सुरू राहील. कायदा व सुव्यवस्था राखण्यासाठी जिल्हाधिकारी कार्यालय परिसरात मोठा पोलीस बंदोबस्त तैनात करण्यात आला होता. या आंदोलनामुळे संपूर्ण प्रशासकीय वर्तुळात एकच खळबळ उडाली आहे.