पुणे: मोठा आर्थिक घोटाळा, सीईओच्या नावाने बनावट आदेश अन् बोगस बिले तयार करून २ कोटी ४५ लाखांचा अपहार; बाणेर पोलिसात गुन्हा दाखल

पुणे: एक अत्यंत खळबळजनक आणि मोठा आर्थिक फसवणुकीचा प्रकार समोर आला आहे. कंपनीने दाखविलेल्या विश्वासाचा गैरफायदा घेत एका कर्मचाऱ्याने खर्च परताव्यासाठी बनावट ई-मेल, खोटी बिले, व्हाउचर तसेच इलेक्ट्रॉनिक नोंदी तयार करून तब्बल २ कोटी ४५ लाख ३६ हजार ५८४ रुपयांचा अपहार केल्याचे उघडकीस आले आहे. याप्रकरणी बाणेर पोलिसांनी संबंधित कर्मचाऱ्याविरुद्ध गंभीर गुन्हे दाखल करून कसून तपास सुरू केला आहे.

पोलिसांनी दिलेल्या सविस्तर माहितीनुसार, या प्रकरणी योगेश सुरेश दीपांकर (वय ४४, रा. बालेवाडी) यांनी बाणेर पोलिस ठाण्यात फिर्याद दिली आहे. त्यांच्या फिर्यादीवरून कौस्तुभ शिवकुमार विभुते (वय ३४, रा. मुंढवा) याच्याविरुद्ध गुन्हा दाखल करण्यात आला आहे. ही धक्कादायक घटना ११ जून २०२४ ते ३ फेब्रुवारी २०२६ या कालावधीत घडली असून, अलीकडेच याप्रकरणी पोलिस ठाण्यात अधिकृत नोंद करण्यात आली आहे.

कसा केला अपहार?
आरोपी कौस्तुभ विभुते याने कंपनीच्या निधीचा अपहार करण्याचा अप्रामाणिक व फसवणुकीचा हेतू बाळगून अत्यंत नियोजनबद्ध पद्धतीने बनावट खर्च, परतफेड कर्ज, बनावट व्हाउचर, इलेक्ट्रॉनिक नोंदी तसेच खोटे ईमेल तयार केले. हे सर्व बनावट दस्तऐवज खरे असल्याचा भास त्याने कंपनीत निर्माण केला. एवढेच नव्हे तर, कंपनीच्या ईआरपी प्रणालीतील (ERP System) माहिती आणि बँक खात्यांच्या तपशीलामध्येही मोठ्या प्रमाणावर फेरफार करण्यात आले.

आरोपीने चलाखी करत मूळ विक्रेत्यांची (Vendors) नावे आणि बिल क्रमांक तसेच ठेवले, परंतु लाभार्थी (बेनिफिशियरी) बँक खाते, आयएफएससी कोड आणि पेमेंटची माहिती बदलून टाकला. त्यामुळे प्रत्यक्ष विक्रेत्यांना मिळणारी रक्कम वळती होऊन ती थेट आरोपीच्या स्वतःच्या बँक खात्यात जमा झाली. विशेष म्हणजे, कंपनीच्या मुख्य कार्यकारी अधिकाऱ्यांच्या (CEO) नावाने बनावट ई-मेल तयार करून ते अधिकृत व उच्चस्तरीय निर्देश असल्याचा बनाव त्याने रचला. संबंधित विभागाने स्वतंत्र पडताळणी न करता आरोपीने दिलेल्या खात्यांमध्ये पैसे वर्ग केल्यामुळे कंपनीची तब्बल २ कोटी ४५ लाख ३६ हजार ५८४ रुपयांची मोठी आर्थिक फसवणूक झाली.

बाणेर पोलिसांनी याप्रकरणी भारतीय न्याय संहिता (BNS) तसेच माहिती तंत्रज्ञान (IT) कायद्यातील संबंधित गंभीर कलमान्वये गुन्हा दाखल केला असून, पोलीस निरीक्षक विजय खिल्लारे या प्रकरणाचा पुढील सखोल तपास करत आहेत.