विमानातच घुसमटला जीव! इंडिगो विमानाचे जबलपूरमध्ये आणीबाणीचे लँडिंग, उपचारादरम्यान २९ वर्षीय तरुणाचा दुर्दैवी मृत्यू

अहमदाबादहून रांचीला जाणाऱ्या इंडिगो एअरबस ३२० विमानाला एका प्रवाशाच्या प्रकृती अस्वास्थ्यामुळे मध्य प्रदेशातील जबलपूर येथील डुमना विमानतळावर आपत्कालीन लँडिंग करावे लागले. हवेत असताना एका २९ वर्षीय तरुणाला अचानक श्वास घेण्यास प्रचंड त्रास होऊ लागल्याने वैमानिकाने विमानाचा मार्ग बदलून ते तातडीने जबलपूरमध्ये उतरवले. मात्र, विमानतळ प्रशासन आणि डॉक्टरांच्या सर्व प्रयत्नांनंतरही उपचारादरम्यान या तरुणाचा दुर्दैवी मृत्यू झाला.

मिळालेल्या माहितीनुसार, सुदीप कुमार गौनीश असे मृत प्रवाशाचे नाव असून तो रांची येथील रहिवासी होता. सुदीप गेल्या काही काळापासून फुफ्फुसाच्या आजाराने ग्रस्त होता. याच आजारावरील उपचारासाठी तो आपल्या बहिणीसोबत अहमदाबादला गेला होता आणि तेथून विमानाने रांचीला परतत होता. विमान हवेत असताना आणि जबलपूरच्या परिसरावरून जात असताना अचानक सुदीपची प्रकृती खालावली आणि त्याला श्वास घेण्यास तीव्र त्रास होऊ लागला.

परिस्थितीचे गांभीर्य लक्षात घेऊन विमानाच्या पायलटने तात्काळ डुमना विमानतळावरील एअर ट्रॅफिक कंट्रोलशी (ATC) संपर्क साधला आणि वैद्यकीय आणीबाणीच्या कारणास्तव विमान उतरवण्याची परवानगी मागितली. परवानगी मिळताच विमानाचे जबलपूर विमानतळावर सुरक्षितपणे लँडिंग करण्यात आले.

विमान जमिनीवर उतरताच विमानतळ प्रशासन आणि इंडिगो एअरलाइन्सच्या कर्मचाऱ्यांनी आधीच तयार ठेवलेली रुग्णवाहिका बोलावून सुदीपला तातडीने जबलपूरमधील एका खाजगी रुग्णालयात दाखल केले. मात्र, रुग्णालयात उपचारादरम्यान त्याची प्राणज्योत मालवली.

डुमना विमानतळाचे प्रभारी संचालक नीरज गुडवाणी यांनी दिलेल्या माहितीनुसार, या वैद्यकीय आणीबाणीच्या प्रसंगानंतर विमान सुमारे ५० मिनिटे जबलपूर विमानतळावर थांबले होते. रुग्णाला रुग्णालयात हलवल्यानंतर आणि आवश्यक ती कायदेशीर प्रक्रिया पूर्ण केल्यानंतर, विमानाने उर्वरित प्रवाशांसह रांचीसाठी पुन्हा उड्डाण केले. या घटनेनंतर सुदीपच्या मृतदेहावर पुढील सोपस्कार करण्यासाठी आणि कुटुंबीयांना मदत करण्यासाठी त्याचे नातेवाईक रांचीहून रवाना झाले आहेत.