काळाचा घाला! वीज नसल्याने घराबाहेर झोपलेल्या कुटुंबाला भरधाव डंपरने चिरडलं; एकाच कुटुंबातील चौघांचा मृत्यू

उत्तर प्रदेशच्या बाराबंकी जिल्ह्यातून एक अत्यंत हृदयद्रावक आणि धक्कादायक घटना समोर आली आहे. तीव्र उष्णतेचा कहर आणि वीज कपातीमुळे त्रस्त झालेले एक कुटुंब रात्री आपल्या घराबाहेर झोपले होते, परंतु ही रात्र त्यांच्या आयुष्याची शेवटची रात्र ठरेल, याची त्यांना पुसटशीही कल्पना नव्हती. एका अनियंत्रित भरधाव डंपरने घराबाहेर झोपलेल्या या कुटुंबाला चिरडले, ज्यामध्ये वडील आणि त्यांच्या तीन निष्पाप मुलांचा दुर्दैवी मृत्यू झाला. या अपघातात आई गंभीर जखमी झाली असून ती सध्या रुग्णालयात मृत्यूशी झुंज देत आहे.

हा भीषण अपघात फतेहपूर पोलीस ठाण्याच्या हद्दीतील फतेहपूर-महमूदाबाद मार्गावरील झांसा गावात रात्री दोन वाजेच्या सुमारास घडला. गावात वीज नसल्यामुळे आणि प्रचंड उकाडा असल्यामुळे ३५ वर्षीय नीरज हे आपली पत्नी आरती आणि तीन मुलांसह घराबाहेर रस्त्याच्या कडेला झोपले होते. त्याच वेळी एक भरधाव डंपर चालकाचे नियंत्रण सुटल्यामुळे अनियंत्रित झाला. हा डंपर आधी रस्त्याच्या कडेला असलेल्या एका झाडाला जोरात धडकला आणि त्यानंतर थेट झोपलेल्या कुटुंबाच्या अंगावर गेला.

अपघाताचा आवाज ऐकून आजूबाजूचे गावकऱ्यांनी तातडीने घटनास्थळाकडे धाव घेतली, मात्र तोपर्यंत खूप उशीर झाला होता. या अपघातात नीरज आणि त्यांचा १३ वर्षांचा मुलगा अनुराग यांचा जागीच मृत्यू झाला. तर १० वर्षांची मुलगी अंशिका आणि ६ वर्षांचा मुलगा आंशू यांना अत्यंत गंभीर अवस्थेत जिल्हा रुग्णालयात दाखल करण्यात आले, परंतु तेथे डॉक्टरांनी त्यांना मृत घोषित केले. नीरज यांची पत्नी आरती या अपघातात गंभीर जखमी झाल्या असून त्यांची प्रकृती चिंताजनक आहे. त्यांना पुढील उपचारासाठी लखनऊच्या लोहिया रुग्णालयात हलवण्यात आले आहे.

गावकऱ्यांनी दिलेल्या माहितीनुसार, नीरज हे अत्यंत कष्टाळू व्यक्ती होते. ते भाड्याने मॅजिक वाहन चालवून आपल्या कुटुंबाचा उदरनिर्वाह करत असत. कुटुंबाची आर्थिक परिस्थिती बेताचीच होती, तरीही ते आपल्या मुलांना चांगले जीवन देण्यासाठी दिवसरात्र मेहनत करत होते. मात्र, एका रात्रीत त्यांचे संपूर्ण कुटुंब उद्ध्वस्त झाले. या अपघातानंतर संपूर्ण गावात शोककळा पसरली असून प्रत्येक जण सुन्न झाला आहे.

घटनेनंतर डंपर सोडून चालक घटनास्थळावरून फरार झाला आहे. पोलिसांनी अपघातास कारणीभूत असलेला डंपर ताब्यात घेतला असून फरार चालकाचा शोध सुरू केला आहे. पोलिसांनी मृतदेह शवविच्छेदनासाठी पाठवले असून पुढील कायदेशीर कारवाई सुरू केली आहे.