टीईटी पेपरफुटी प्रकरणात मोठी कारवाई! सूत्रधार बिजेंद्र गुप्ताची पत्नी बिहारमधून अटकेत

महाराष्ट्र: शिक्षक पात्रता परीक्षा (टीईटी) पेपरफुटी प्रकरणात विशेष तपास पथकाने (SIT) आणखी एक महत्त्वाची कारवाई करत मुख्य सूत्रधार म्हणून संशयित असलेल्या फरार आरोपी बिजेंद्र गुप्ता याची पत्नी सुमन कुमारी हिला बिहारमधील पाटणा येथून अटक केली आहे. या अटकेमुळे तपासाला नवे धागेदोरे मिळण्याची शक्यता व्यक्त केली जात आहे. तपासादरम्यान सुमन कुमारी हिची भूमिका आर्थिक व्यवहारांशी संबंधित असल्याची माहिती समोर आली. तपास अधिकाऱ्यांच्या मते, आरोपींना आर्थिक मदत पुरविणे तसेच काही व्यवहारांमध्ये तिचा सहभाग असल्याचा संशय आहे. अटकेनंतर तिलापुढील चौकशीसाठी महाराष्ट्रात आणून न्यायालयात हजर केले जाणार आहे.

या प्रकरणात आतापर्यंत चार जणांना अटक करण्यात आली असून मुख्य आरोपी बिजेंद्र गुप्ता अद्याप फरार आहे. त्याचा शोध घेण्यासाठी विविध राज्यांमध्ये विशेष पथके रवाना करण्यात आली आहेत. त्याच्याविरुद्ध लुकआउट सर्क्युलर (LOC) जारी करण्याची प्रक्रियाही सुरू असल्याचे पोलिसांनी सांगितले आहे.

 

तपास अधिकाऱ्यांच्या माहितीनुसार, बिजेंद्र गुप्ता हा अनेक बनावट नावांचा वापर करत विविध राज्यांतील परीक्षा पेपरफुटी प्रकरणांमध्ये सक्रिय असल्याचा संशय आहे. महाराष्ट्रासह बिहार, उत्तर प्रदेश, हरियाणा, दिल्ली आणि ओडिशामधील काही परीक्षा घोटाळ्यांशी त्याचे संबंध असल्याचा तपास यंत्रणांचा दावा आहे.

टीईटी परीक्षा होण्याच्या काही दिवसांपूर्वी आरोपींनी संभाव्य खरेदीदारांचा शोध घेतल्याची माहिती तपासातून समोर आली आहे.गुप्त माहितीच्या आधारे पोलिसांनी सापळा रचत काही आरोपींना प्रश्नपत्रिका विक्रीच्या प्रयत्नादरम्यान अटक केली होती. त्यानंतर
तपासाचा विस्तार करण्यात आला आणि संपूर्ण आंतरराज्यीय रॅकेट उघड करण्यासाठी SIT कार्यरत आहे.

दरम्यान, पेपरफुटी उघड झाल्यानंतर महाराष्ट्रातील टीईटी परीक्षा पुढे ढकलण्यात आली होती. राज्य सरकारने उमेदवारांना पुन्हा अर्ज किंवा शुल्क भरण्याची आवश्यकता नसल्याचे स्पष्ट केले असून नव्या तारखेची घोषणा स्वतंत्रपणे केली जाणार असल्याचे सांगितले आहे.