केरळ: हायवेवर उभ्या असलेल्या लॉरीला कार धडकल्याने इंजिनिअरिंगच्या ८ विद्यार्थ्यांचा करुण अंत!

केरळ: तृसूर जिल्ह्यात एक अत्यंत भीषण आणि मन हेलावून टाकणारी दुर्घटना घडली आहे. तामिळनाडूच्या दिंडीगुल येथील एका अभियांत्रिकी महाविद्यालयात (Engineering College) शिक्षण घेणारे आठ तरुण विद्यार्थी एका रस्ता अपघातात जागीच व उपचारादरम्यान मृत पावल्याची दुर्दैवी घटना समोर आली आहे. या भीषण अपघातामुळे तामिळनाडू आणि केरळमध्ये शोककळा पसरली असून सर्वत्र हळहळ व्यक्त केली जात आहे.

मिळालेल्या सविस्तर माहितीनुसार, हा अपघात शुक्रवारी मध्यरात्री ११:४० वाजण्याच्या सुमारास केरळमधील तृसूर जिल्ह्यातील कैपामंगलम येथील पानामबिक्कुन्नू केंद्रानजीक राष्ट्रीय महामार्ग ६६ (NH-66) वर घडला. हे सर्व तरुण एका कारमधून गुरुवायूर येथून कोडुंगल्लूरच्या दिशेने जात होते. दरम्यान, राष्ट्रीय महामार्गाचे बांधकाम सुरू असलेल्या एका पट्ट्याभोवती बॅरिकेट्स लावून वाहतूक वळवण्यात आली होती. या बांधकाम सुरू असलेल्या रस्त्यार सुसाट वेगात धावणारी त्यांची कार चालकाचा अंदाज चुकल्यामुळे रस्त्याच्या उजव्या बाजूला उभ्या असलेल्या एका वस्तूंनी भरलेल्या मालवाहू लॉरीच्या (ट्रक) मागच्या भागाला अत्यंत वेगाने धडकली. ही लॉरी महाराष्ट्रात नोंदणीकृत (Maharashtra-registered) असल्याचे पोलिसांनी सांगितले आहे.

धडक इतकी भयानक होती की, कारचा चुराडा झाला आणि आतील प्रवासी गंभीरपणे अडकले. अपघाताची माहिती मिळताच स्थानिक नागरिक, अग्निशामक दल (Fire and Rescue personnel) आणि पोलीस तातडीने घटनास्थळी दाखल झाले. त्यांनी प्रचंड मेहनत घेत कारचा भाग गॅस कटरने कापून आतील तरुणांना बाहेर काढले. या दुर्घटनेत ६ विद्यार्थ्यांनी घटनास्थळावरच प्राण सोडले, तर गंभीर जखमी झालेल्या इतर २ जणांना तातडीने नजीकच्या रुग्णालयात दाखल करण्यात आले, मात्र उपचारापूर्वीच त्यांचाही मृत्यू झाल्याचे डॉक्टरांनी घोषित केले.

पोलिसांनी मृत विद्यार्थ्यांची ओळख पटवली असून त्यांच्याजवळील ओळखपत्रांच्या (ID Cards) आधारे मृतांचे नातेवाईक व कुटुंबीयाेशी संपर्क साधण्यात आला आहे. मृतांमध्ये प्रामुख्याने सूर्या, युवसंजीव, विश्वा, जोशुा (दिंडीगुल येथील) तसेच संतोष आणि प्रसन्ना (मदुराई येथील) यांचा समावेश असून इतरांची ओळख पटवण्याचे काम सुरू आहे. याप्रकरणी कैपामंगलम पोलिसांनी पसार झालेल्या लॉरी चालकाविरोधात भारतीय न्याय संहितेच्या (BNS) कलम १०५ नुसार सदोष मनुष्यवधाचा (Culpable Homicide) गुन्हा दाखल केला असून पुढील कायदेशीर तपास सुरू आहे.