सोलापुरात ऐतिहासिक कारवाई! २ कोटींचे एमडी ड्रग्ज जप्त; फिल्मी स्टाईलने तस्करांच्या मुसक्या आवळल्या

सोलापूर: सोलापूर शहर गुन्हे शाखेने अंमली पदार्थ माफियांविरोधात आतापर्यंतची सर्वात मोठी आणि धडक कारवाई केली आहे. एका फिल्मी स्टाईलने रचलेल्या सापळ्यात पोलिसांनी १ कोटी ९० लाख रुपये किमतीचे तब्बल ९५० ग्रॅम 'मेफेड्रोन' (MD) ड्रग्ज जप्त केले आहेत.

असा रचला सापळा:
गुन्हे शाखेला गुप्त माहिती मिळाली होती की, मुस्लिम कब्रस्तान ते संगमेश्वर कॉलेजकडे जाणाऱ्या रस्त्यावर एका 'हुंडाई व्हेन्यू' कारमधून अंमली पदार्थांची मोठी तस्करी होणार आहे. या माहितीनुसार पोलिसांनी सापळा रचला. संशयित कार येताच पोलिसांनी तिला घेराव घालून झडती घेतली. कारच्या ड्रायव्हर सीटजवळील ड्रॉवरमध्ये एका प्लास्टिक पिशवीत पांढऱ्या रंगाची पावडर आढळली, जी फॉरेन्सिक तपासणीत उच्च दर्जाचे 'एमडी' ड्रग्ज असल्याचे स्पष्ट झाले.

आरोपी आणि मुद्देमाल:
या प्रकरणात पोलिसांनी रिजवान शब्बीर खान आणि साहील सिकंदर पिरजादे या दोन आरोपींना अटक केली असून न्यायालयाने त्यांना चार दिवसांची पोलीस कोठडी सुनावली आहे. तपासात साहीलची पत्नी कायनात खान हिचाही या गुन्ह्यात सहभाग असल्याचे समोर आले असून पोलीस तिचा शोध घेत आहेत. पोलिसांनी १.९० कोटींचे ड्रग्ज आणि १० लाख रुपयांची कार असा एकूण २ कोटींचा मुद्देमाल जप्त केला आहे. या प्रकरणाचे धागेदोरे मुंबईशी जोडलेले असून पोलीस 'मुंबई कनेक्शन'चा अधिक तपास करत आहेत.