मुंबईकरांनो सावधान! पुढील ७२ तास उष्णतेची लाट आणि कडक उन्हाचा इशारा; तापमान ३५ अंशावर जाणार

मुंबई: गेल्या काही दिवसांपासून मुंबई शहरासह उपनगरांमध्ये तापमानात मोठी वाढ होत असल्याचे दिसून येत असून, उकाड्यामुळे नागरिकांची प्रचंड लाहीलाही होत आहे. राज्यातील काही भागांमध्ये परतीचा पाऊस सक्रिय असताना आणि तो बऱ्याच ठिकाणी बरसत असतानाही, मुंबईत मात्र उन्हाचा तडाखा आणि दमट हवामानामुळे नागरिकांना नकोसे झाले आहे. या पार्श्वभूमीवर हवामान विभागाने (IMD) अत्यंत महत्त्वाची आणि सतर्कतेची माहिती दिली असून, आगामी ७२ तास मुंबईकरांसाठी आरोग्याच्या दृष्टीने अत्यंत कसोटीचे आणि काळजीचे असणार आहेत.

हवामान खात्याच्या अंदाजानुसार, पुढील काही तासांत आणि विशेषतः पुढील ७२ तासांत मुंबईतील तापमानाचा पारा आणखी वेगाने वर चढण्याची शक्यता आहे. या काळात मुंबईचे कमाल तापमान ३५ अंश सेल्सिअस किंवा त्याहून अधिक नोंदवले जाण्याची दाट शक्यता वर्तवण्यात आली आहे. दिवसभर कडक ऊन आणि हवेतील वाढलेली आद्रता (humidity) यामुळे घामाच्या धारा वाहत असून नागरिकांना तीव्र उकाड्याचा सामना करावा लागत आहे. दुपारच्या वेळेत घराबाहेर पडणाऱ्या चाकरमान्यांच्या आणि सर्वसामान्य नागरिकांच्या अंगाची लाहीलाही होत आहे.

हवामान विभागाने दिलेल्या माहितीनुसार, या अचानक वाढलेल्या उष्णतेमुळे आणि दमट वातावरणामुळे आरोग्याच्या विविध समस्या निर्माण होऊ शकतात. त्यामुळे नागरिकांनी, विशेषतः लहान मुलांनी, वृद्धांनी आणि आरोग्याची तक्रार असलेल्या व्यक्तींनी दुपारच्या वेळी विनाकारण घराबाहेर पडणे टाळावे, असे आवाहन प्रशासनाकडून करण्यात आले आहे. तसेच शरीरातील पाण्याचे प्रमाण टिकवून ठेवण्यासाठी जास्तीत जास्त पाण्याचे सेवन करावे, हलके आणि सुती कपडे वापरावे तसेच उन्हापासून स्वतःचा बचाव करण्यासाठी योग्य ती खबरदारी घ्यावी, असा सल्ला हवामान तज्ज्ञांनी दिला आहे. प्रशासनाकडून आणि हवामान विभागाकडून परिस्थितीवर सतत लक्ष ठेवले जात असून नागरिकांना हवामानातील बदलांनुसार सतर्क राहण्याचे आवाहन पुन्हा एकदा करण्यात आले आहे.