नागपूर: हवाई दलाच्या अधिकाऱ्याच्या पत्नीला गुंगीचे औषध देऊन अत्याचार, ब्लॅकमेलिंग आणि बळजबरीने धर्मांतराचा प्रयत्न!

नागपूर: शहरात एका भारतीय हवाई दलाच्या (IAF) अधिकाऱ्याच्या पत्नीवर बलात्कार, अश्लील व्हिडिओच्या आधारे ब्लॅकमेलिंग आणि बळजबरीने धर्मांतर करण्याचा प्रयत्न केल्याची धक्कादायक घटना उघडकीस आली आहे. या घटनेचा एक थरारक व्हिडिओ सध्या सोशल मीडियावर व्हायरल होत असून, यामुळे शहरात खळबळ उडाली आहे.

नेमकी घटना काय?
पीडित २४ वर्षीय महिला प्रॉपर्टी डीलिंगचे काम करते, तर तिचे पती भारतीय हवाई दलात अधिकारी आहेत. फेब्रुवारी २०२५ मध्ये पीडितेचा जुना वर्गमित्र अय्याज ताज मडारे (२६) याने प्लॉट खरेदी करण्याच्या बहाण्याने तिला वर्धा रोडवरील एका हॉटेलमध्ये बोलावले. तिथे त्याने पीडितेला शीतपेयात गुंगीचे औषध देऊन तिच्यावर बलात्कार केला आणि त्याचे अश्लील व्हिडिओ व फोटो काढले. या आक्षेपार्ह व्हिडिओच्या जोरावर आरोपीने पीडितेला वारंवार ब्लॅकमेल करून तिचे लैंगिक शोषण केले आणि तिच्याकडून सुमारे ३.०९ लाख रुपये उकळले.

 

धर्मांतराचा अघोरी प्रयत्न:
पीडितेने आरोप केला आहे की, आरोपी अय्याज सतत तिच्यावर इस्लाम धर्म स्वीकारण्यासाठी दबाव टाकत होता. ३१ मे रोजी आरोपीने तिला नागपूरजवळील कळमेश्वर येथे नेले, जिथे तिची ओळख अमीन शेख (३०) आणि हजरत मौलाना याच्याशी करून देण्यात आली. या तिघांनी तिला एका निर्जन स्थळी नेऊन काही धार्मिक विधी केले. व्हायरल झालेल्या व्हिडिओमध्ये अय्याज पीडितेचे हात धरून तिच्यावर फुंकर मारत असल्याचे आणि धर्मांतराचे विधी करत असल्याचे दिसत आहे. या विधीनंतरही तिच्यावर पुन्हा बलात्काराचा प्रयत्न करण्यात आला.

पोलीस कारवाई:
पीडितेचे पती कर्तव्यावरून घरी परतल्यानंतर तिने त्यांना घडलेला सर्व प्रकार सांगितला. त्यानंतर सोनेगाव पोलीस ठाण्यात गुन्हा दाखल करण्यात आला. पोलिसांनी मुख्य आरोपी अय्याज मडारे आणि अमीन शेख यांना अटक केली असून, त्यांना न्यायालयाने पाच दिवसांची पोलीस कोठडी सुनावली आहे. या प्रकरणात मध्य प्रदेशातील तामिया येथील रहिवासी असलेला तिसरा आरोपी हजरत मौलाना याचा शोध सुरू आहे. पोलिसांनी या प्रकरणी बलात्कार, खंडणी, धर्मांतर प्रतिबंधक कायदा आणि जादूटोणा विरोधी कायद्यांतर्गत गुन्हे दाखल केले आहेत.