परभणी: शाम्पूच्या पुड्या वाचवण्याच्या नादात दोन सख्ख्या बहिणींसह काकीचा गोदावरी नदीत बुडून दुर्दैवी अंत.

परभणी: जिल्ह्यातील सोनपेठ तालुक्यातील मोहळा गावातून एक अत्यंत हृदयद्रावक बातमी समोर आली आहे. गोदावरी नदीपात्रात अंघोळीसाठी गेलेल्या दोन सख्ख्या बहिणी आणि त्यांना वाचवण्यासाठी गेलेल्या त्यांच्या काकीचा पाण्यात बुडून दुर्दैवी मृत्यू झाला. ही घटना १४ जून रोजी घडली असून, या दुर्घटनेमुळे संपूर्ण परिसरात शोककळा पसरली आहे.

नेमकी घटना कशी घडली?
मिळालेल्या माहितीनुसार, पुण्यातील एका नामांकित कंपनीत नोकरी करणारी तरुणी आपल्या वीकेंडच्या सुट्टीसाठी गावी आली होती. ती आपली बहीण समीक्षा (१७) आणि काकी सिंधू दत्ता जाधव (४५) यांच्यासह मोहळा येथील गोदावरी नदीपात्रात कपडे धुण्यासाठी आणि अंघोळीसाठी गेल्या होत्या. दरम्यान, तरुणीच्या हातातील शाम्पूच्या १० पुड्या अचानक पाण्यात निसटून वाहून जाऊ लागल्या. त्या पुड्या पकडण्यासाठी तिने एक प्लास्टिकचा रिकामा डबा हातात घेतला आणि ती नदीच्या खोल पाण्यात उतरली. मात्र, डब्याचे झाकण उघडल्याने त्यात वेगाने पाणी शिरले आणि तिचे संतुलन बिघडले. तिला पाण्यात बुडताना पाहून तिची बहीण समीक्षा तिला वाचवण्यासाठी पुढे धावली, मात्र पाण्याचा अंदाज न आल्याने तीदेखील बुडू लागली. या दोघींना वाचवण्यासाठी त्यांच्या काकी सिंधू जाधव यांनीही कसलाही विचार न करता पाण्यात उडी घेतली. दुर्दैवाने, तिघींनाही पोहता येत नसल्यामुळे आणि नदीची खोली जास्त असल्यामुळे त्या तिघीही पाण्याच्या प्रवाहात बुडाल्या.

 

गावकरी मदतीसाठी धावले, पण...
काही वेळाने ग्रामस्थांना या घटनेची माहिती मिळताच त्यांनी तात्काळ नदीकाठाकडे धाव घेतली. गावकऱ्यांनी शोधमोहीम राबवून तिन्ही मृतदेह पाण्याबाहेर काढले, परंतु तोपर्यंत तिघींचाही मृत्यू झाला होता. या घटनेत मृत्यू पावलेल्यांची नावे उत्कर्षा उत्तम जाधव, समीक्षा उत्तम जाधव आणि सिंधू दत्ता जाधव अशी आहेत. या घटनेमुळे जाधव कुटुंबावर दुःखाचा डोंगर कोसळला असून मोहळा गावात सर्वत्र हळहळ व्यक्त केली जात आहे.