Solapur : सोलापूरमध्ये महापौर-उपमहापौर बिनविरोध; सभागृहाच्या पहिल्याच दिवशी नगरसेवकांत शाब्दिक चकमक, नेमकं काय घडलं?

Solapur : सोलापूर महानगरपालिका निवडणुकीत भाजपने अभूतपूर्व यश प्राप्त केल्यानंतर सोलापूर महापौरपदी भाजपचे विनायक कोंड्याल यांची बिनविरोध निवड झाली आहे. शिवसेनेचे प्रियदर्शन साठे आणि एमआयएमचे तौफिक हतुरे यांनी शेवटच्या मिनिटात माघारी घेतल्याने पीठासीन अधिकारी यांनी बिनविरोध झाल्याची घोषणा केली आहे.समान निधी देण्याच्या शब्दावर माघारी घेत असल्याची प्रतिक्रिया शिवसेनेचे जिल्हाध्यक्ष अमोल शिंदें यांनी दिली. उपमहापौरपदी ज्ञानेश्वरी देवकर यांची सुद्धा बिनविरोध निवड झाली आहे. सोलापूर महानगरपालिकेत भाजप 87 नगरसेवकांमुळे सर्वात मोठा पक्ष म्हणून उदयास आला असून एमआयएमचे 8 नगरसेवक नगरसेवक म्हणून सभागृहात दाखल झाले आहेत.

सोलापूर महानगरपालिका सभागृहात 102 नगरसेवकांपैकी काँग्रेसचे फक्त दोनच नगरसेवक निवडून आले आहेत. एकेकाळी एकहाती सत्ता असलेल्या काँग्रेसवर फक्त दोनच नगरसेवक घेऊन बसण्याची वेळ काँग्रेसवर आली आहे. दुसऱ्या क्रमांकावर असलेल्या एममआयएम पक्षाकडे विरोधी पक्ष जाण्याची शक्यता वर्तवली जात आहे.

Kolhapur Mayor : कोल्हापूर महापालिकेला नवा महापौर! भाजपच्या रुपाराणी निकम यांचा विजय, राजकारणात नवा अध्याय

समान निधी देण्याच्या शब्दावरून माघार घेतली
महापौरपदाची निवडणूक होऊ नये, बिनविरोध महापौर व उपमहापौर व्हावा यासाठी भाजपचे नगरसेवक शिवसेना नगरसेवक अमोल शिंदें आणि एमआयएमचे गटनेते वाहिदा शेख यांची मनधरणी करत होते. समान निधी देण्याच्या शब्दावरून माघार घेत आहोत,अशी प्रतिक्रिया अमोल शिंदें यांनी दिली आहे.

पहिल्याच दिवशी शाब्दीक चकमक
दरम्यान, पालकमंत्री जय कुमार गोरे यांच्या प्रवेशा नंतर महापौर आणि उपमहापौर यांचा सत्कार होईल,अशी भूमिका भाजपची होती. त्यावरुन विरोधक आणि सत्ताधारी यांच्या नेत्यांमध्ये यावेळी मोठी शाब्दिक चकमक झाल्याची पाहायला मिळाली. यानंतर भाजपची एकाधिकारशाही खूप वाढली आहे ते चालू देणार नाही अशी भूमिका शिवसेना नगरसेवक अमोल शिंदे यांनी मांडली.

दरम्यान, यंदाची महानगरपालिका निवडणूक अनेक कारणांनी गाजली. भाजपने काँग्रेसला खूप मोठा धक्का दिला आहे. खासदार प्रणिती शिंदे यांचा गड त्यांना राखता आला नाही. सोलापूमध्ये एआयएमआयएमनेही त्यांचे उमेदवार दिले होते, त्यांच्याही जागा याठिकाणी निवडून आल्या आहेत.