Pune : पुणे धक्कादायक घटना, शेजाऱ्याने चिमुकलीला आंब्याचं आमिष दाखवून अत्याचार केल्याचा आरोप; आईच्या लक्षात आल्याने प्रकरण उघड

Pune : पिंपरी-चिंचवड शहरातून एक संतापजनक आणि धक्कादायक घटना समोर आली आहे. आंब्याचे आमिष दाखवत अवघ्या अडीच वर्षांच्या चिमुरडीवर लैंगिक अत्याचार केल्याची गंभीर घटना उघडकीस आली असून, परिसरात तीव्र संताप व्यक्त केला जात आहे. या प्रकरणी 47 वर्षीय विजय पोपट भोसले याला काळेवाडी पोलिसांनी अटक केली आहे.

मिळालेल्या माहितीनुसार, आरोपी विजय भोसले हा काळेवाडी परिसरात कुटुंबासह राहत होता. पीडित चिमुरडीचे कुटुंबही त्याच भागात वास्तव्यास आहे. सोमवारी दुपारी चिमुरडी तिच्या दोन बहिणींसोबत घराजवळ खेळत असताना आरोपीने आंबा देण्याचे आमिष दाखवत तिन्ही मुलींना जवळ बोलावले. त्यानंतर दोन मुलींना बाहेर पाठवून त्याने चिमुरडीवर अत्याचार केल्याचा आरोप आहे.

दरम्यान, चिमुरडीची आई अचानक घटनास्थळी पोहोचली आणि तिने हा प्रकार प्रत्यक्ष पाहिला. या धक्कादायक घटनेनंतर चिमुरडीला तातडीने पिंपरी-चिंचवड महानगरपालिकेच्या वायसीएम रुग्णालयात दाखल करण्यात आले. वैद्यकीय तपासणीत अत्याचार झाल्याचे स्पष्ट झाले.

रुग्णालय प्रशासनाकडून माहिती मिळताच काळेवाडी पोलिसांनी तात्काळ कारवाई करत घटनास्थळी धाव घेतली. पीडितेच्या आईकडून सविस्तर जबाब घेतल्यानंतर काही तासांतच आरोपीला अटक करण्यात आली.

या घटनेमुळे लहान मुलांच्या सुरक्षेचा प्रश्न पुन्हा एकदा ऐरणीवर आला आहे. विशेषतः ओळखीतील व्यक्तीकडूनच असा प्रकार घडल्याने पालकांमध्ये भीतीचे वातावरण निर्माण झाले आहे. या प्रकरणाचा पुढील तपास काळेवाडी पोलीस करत आहेत.