तेलंगणा: १५ वर्षांच्या संसारानंतर इन्शुरन्सच्या पैशांसाठी पत्नीने प्रियकरासोबत मिळून रचला पतीच्या हत्येचा कट!

कामारेड्डी (तेलंगणा): पती-पत्नीच्या नात्याला काळीमा फासणारी एक अत्यंत धक्कादायक घटना तेलंगणातील कामारेड्डी जिल्ह्यातून समोर आली आहे. लग्नाच्या तब्बल १५ वर्षांनंतर एका महिलेने आपल्या प्रियकराच्या मदतीने पतीची निर्घृण हत्या केली. हत्येचा मुख्य उद्देश पतीला वाटेतून बाजूला करणे आणि त्याच्या नावावर असलेला इन्शुरन्सचा मोठा पैसा हडपणे हा होता.

नेमकी घटना काय?
मृताचे नाव कांचरला राजायाह (४५) असे आहे. २२ मे रोजी राजायाह यांची पत्नी रेणुका हिने पोलिसांत तक्रार दाखल केली होती की, रात्रीच्या वेळी शेतात जात असताना पतीचा अपघाती मृत्यू झाला. रस्त्यावर अचानक प्राणी समोर आल्याने राजायाह यांचे दुचाकीवरील नियंत्रण सुटले आणि ते खाली पडून मरण पावले, असा बनाव तिने रचला होता.

 

पोस्टमॉर्टम रिपोर्टने उघडले सत्य
रेणुकाच्या तक्रारीनंतर पोलिसांनी अपघाताचा तपास सुरू केला. मात्र, अपघाताच्या ठिकाणचे पुरावे आणि रेणुकाची वर्तणूक पोलिसांना संशयास्पद वाटली. पोलिसांनी सीसीटीव्ही फुटेज, साक्षीदारांचे जबाब आणि तांत्रिक पुराव्यांची तपासणी केली. सर्वात महत्त्वाचा दुवा म्हणजे पोस्टमॉर्टम रिपोर्ट, ज्यामध्ये मृतदेहावरील जखमा या रस्ते अपघातातील नसून हत्येच्या असल्याचे समोर आले.

प्रियकरासोबत मिळून कट
पोलिसांनी कसून चौकशी केल्यानंतर गंगाशेखर (३७) या व्यक्तीला ताब्यात घेतले. चौकशीदरम्यान त्याने धक्कादायक कबुली दिली की, रेणुका आणि त्याचे गेल्या चार वर्षांपासून अनैतिक संबंध होते. प्रेमातील अडथळा दूर करण्यासाठी आणि पतीच्या इन्शुरन्सचे पैसे मिळवण्यासाठी त्यांनी राजायाह यांच्या हत्येचा पूर्वनियोजित कट रचला होता. पोलिसांनी या प्रकरणात पत्नी रेणुका आणि तिचा प्रियकर गंगाशेखर या दोघांनाही अटक केली आहे. या घटनेमुळे कामारेड्डी परिसरात एकच खळबळ उडाली आहे.