पुणे: मोशी दुर्घटनेवरून भाजप आणि राष्ट्रवादीत कलगीतुरा; आमदार रोहित पवार यांच्या टीकेला भाजपचे नेते प्रशांत शितोळे यांचे जोरदार प्रत्युत्तर

पुणे: राष्ट्रवादी काँग्रेस (शरद पवार) पक्षाचे आमदार रोहित पवार यांनी महापालिकेत शुक्रवारी (दि. १४) बैठक घेतली. अँटनी कंपनीला पाठीशी घातले जात आहे, अशी टीका सत्ताधारी आणि प्रशासनावर पवार यांनी केली. मागील वेळी पवार यांनी आमदार महेश लांडगे यांचे ठेकेदारांना पाठबळ असल्याची टीका केली होती. 'महापालिकेत शून्य असलेल्या पक्षाने टीका करणे योग्य नाही. नगरकडे लक्ष द्यावे, येथे लुडबूड करू नये,' असे पवार यांच्या टीकेस भाजपचे पक्षनेते प्रशांत शितोळे यांनी उत्तर दिले आहे.

मोशी दुर्घटनेवरून मागील आठवड्यात आमदार रोहित पवार यांनी महापालिका प्रशासन आणि सत्ताधारी भाजपवर निशाणा साधला होता. भोसरीतील कचरा ठेकेदार आणि कंपनीला आमदार लांडगे यांचे पाठबळ आहे, अशी थेट टीका केली होती. त्यानंतर आज महापालिकेस भेट दिली. आयुक्त डॉ. विजय सूर्यवंशी यांच्याकडून माहिती घेतली.

 

 

आमदार रोहित पवार म्हणाले, पीडित कुटुंबीयांना एक कोटी रुपये मदत मिळावी, अशी आमची मागणी होती. त्यामुळे २५ लाखांवरून चाळीस लाखांवर कंपनी गेली. त्या कुटुंबीयांना हक्काचे घर मिळावे. आता पीडित कुटुंबीयांना धमकावून ४० लाख घेण्याबाबत सांगण्यात येत आहे, याबाबत शहानिशा करणार आहे. दोषी आढळलेल्या अधिकाऱ्यांना केवळ निलंबित करून चालणार नाही, तर नोकरीतून बडतर्फ करावे. अँटोनी कंपनीच्या मालकावर देखील गुन्हा दाखल करावा. कंपनीतील आल्हाट नावाचे अधिकारी देखील जबाबदार आहेत. मोशी डेपोत घरगुती ओल्या कचऱ्यापासून सीएनजी निर्मितीचा नवीन प्रकल्प आम्ही होऊ देणार नाही. अहवाल अद्याप आलेला नाही, त्याची आम्हीही वाट पाहत आहोत.

महापालिका पक्षनेते प्रशांत शितोळे म्हणाले, दोषी आढळलेल्या अधिकाऱ्यांवर आणि कंपनीवर प्रशासनाने कारवाई केली आहे. समितीकडून चौकशी सुरू आहे. आरोप करणारे महिन्यानंतर आले आणि राजकीय आरोप करीत आहेत. अपघाताला भाजप आणि आमदार जबाबदार आहेत. आमदार महेश लांडगे यांच्यावर आरोप करणे चुकीचे आहे. मोशीतील कचरा काय आमदार लांडगे यांनी निर्माण केला आहे का? यापूर्वी राष्ट्रवादी सत्तेत होती. मग काय मोशीच्या घटनेस राष्ट्रवादी जबाबदार आहे का? किमान आम्ही प्रक्रिया प्रकल्प सुरू केले; मात्र तुम्ही काय केले, असा प्रश्न आहे. आम्हीही राष्ट्रवादीत काम केले, मात्र कोणाच्या तरी सांगण्यावरून टीका आणि लुडबूड करणे रोहित पवार यांना शोभत नाही.