कोल्हापूर: वीजचोरीचा मोठा भांडाफोड शिरोळमध्ये स्मार्ट मीटरमध्ये फेरफार करून ९ लाखांची चोरी; पाच जणांविरुद्ध गुन्हा दाखल!

कोल्हापूर: स्मार्ट मीटरमध्ये छेडछाड करून तब्बल ४३ हजार ६३८ युनिट वीजचोरी केल्याचा प्रकार महावितरणच्या जयसिंगपूर विभागाने उघडकीस आणला आहे. संभाजीपूर (ता. शिरोळ) येथील गणेश क्रश सॅण्ड कंपनी केंद्रात हा प्रकार आढळला. चोरी केलेल्या विजेची किंमत ९ लाख ११ हजार ६२० रुपये आहे. या प्रकरणी जयसिंगपूर पोलिस ठाण्यात पाच जणांविरुद्ध गुन्हा दाखल करण्यात आला आहे. संबंधित ग्राहकाला सुमारे २० लाख रुपयांचा तडजोड आकारही लावण्यात आला आहे.

महावितरणच्या पथकाने २० जुलैला संभाजीपूर येथील गणेश क्रश सॅण्ड कंपनी या ग्राहकाच्या वीज जोडणीची तपासणी केली. त्यावेळी मीटरमध्ये फेरफार केल्याचा संशय आल्याने मीटर ताब्यात घेऊन त्याची तांत्रिक तपासणी करण्यात आली. या तपासणीत मीटरच्या तीनपैकी दोन फेजच्या सीटीच्या तारा मीटरला छेद देऊन कापण्यात आल्याचे आढळले. या छेडछाडीमुळे मीटर ६६.६६ टक्के संथ चालत असल्याचे तांत्रिक तपासणीत स्पष्ट झाले.

 

१० एप्रिल ते २१ जुलै २०२६ या कालावधीत ही छेडछाड करून वीज चोरी झाल्याचे तपासणीत निष्पन्न झाले. या कालावधीत एकूण ४३ हजार ६३८ युनिट वीज चोरी झाल्याचे आढळून आले. त्याची किंमत ९ लाख ११ हजार ६२० रुपये आहे. संबंधित ग्राहकाचा वीजभार सुमारे २०० किलोवॅट असल्याने विद्युत अधिनियमातील तरतुदीनुसार २० लाख रुपयांचा तडजोड आकार निश्चित करण्यात आला आहे. त्यापैकी वीज चोरीपोटीची ९ लाख ११ हजार रुपये रक्कम ग्राहकाने भरली आहे.

"वीज चोर कितीही 'स्मार्ट' झाला तरी महावितरणकडे उपलब्ध अत्याधुनिक तंत्रज्ञान आणि तपासणीच्या शास्त्रोक्त पद्धतींमुळे मीटरमध्ये केलेली छेडछाड लपून राहात नाही. जयसिंगपूर येथील प्रकरणातही तपासणीदरम्यान मीटरमध्ये केलेली छेडछाड तांत्रिक तपासणीत उघड झाली. गणपत लटपटे, प्रभारी मुख्य अभियंता तथा अधीक्षक अभियंता, महावितरण, कोल्हापूर'