पुणे: तुकाराम मुंढेंच्या एफडीए पथकाची मोठी कारवाई; अन्न सुरक्षेचे उल्लंघन व अस्वच्छतेमुळे १६ आस्थापनांचे परवाने निलंबित

पुणे: अन्न व औषध प्रशासनाचे (FDA) आयुक्त तुकाराम मुंढे यांच्या मार्गदर्शनाखाली राज्यभरात 'सेफ फूड, सेफ ड्रग, सेफ महाराष्ट्र' ही विशेष मोहीम तीव्र करण्यात आली आहे. याच मोहिमेचा भाग म्हणून पुणे विभागात अन्न व औषध प्रशासनाच्या पथकाने ११ ते १४ ऑगस्ट दरम्यान हॉटेल, रेस्टॉरंट, ई-कॉमर्स आस्थापना आणि डेअरींवर धडक तपासणी मोहीम राबवली. या तपासणीदरम्यान अन्न सुरक्षेच्या नियमांचे गंभीर उल्लंघन आणि मोठ्या प्रमाणावर अस्वच्छता आढळल्याने तब्बल १६ आस्थापनांचे परवाने तात्काळ निलंबित करण्यात आले आहेत.

कोणत्या प्रमुख आस्थापनांवर झाली कारवाई? अन्न व औषध प्रशासनाच्या या धडक कारवाईत अनेक नामांकित हॉटेल्स, रेस्टॉरंट्स आणि फूड चेनचा समावेश आहे. तपासणीमध्ये गंभीर त्रुटी आढळल्यामुळे खालील आस्थापनांवर कारवाईचा बडगा उगारण्यात आला आहे:

• फॉर्च्यून एंटरप्रायझेस (हॉटेल सयाजी), लोणावळा

• हॉटेल चूल मटण, लोहेगाव

• सिम्पली साऊथ, भोसरी

• हॉटेल पवन, कोल्हापूर

• राजेश चायनीज, सांगली

• बर्गर किंग, कॅम्प, पुणे

• डोमिनोज पिझ्झा आणि पिझ्झा हट (मलकापूर व कराड परिसर)

• जेबीएम हॉस्पिटॅलिटी (वानवडी येथील एचडीएफसी बँकेची कॅन्टीन) - ही कॅन्टीन कोणत्याही वैध परवान्याशिवाय विनापरवाना सुरू असल्यामुळे ती तात्काळ बंद करण्याचे निर्देश देण्यात आले.

अस्वच्छता आणि अन्न हाताळणीतील गंभीर त्रुटी: तपासणीदरम्यान अनेक ठिकाणी अन्न तयार करण्याच्या आणि साठवण्याच्या जागेवर अत्यंत अस्वच्छता असल्याचे निदर्शनास आले. अन्न हाताळणीमधील त्रुटी, निकृष्ट दर्जाचे घटक, तसेच अन्न सुरक्षा आणि मानके (Food Safety Standards) नियमांचे योग्य पालन होत नसल्याचे स्पष्ट झाले. नागरिकांच्या आरोग्याशी खेळणाऱ्या कोणत्याही आस्थापनांना अजिबात खपवून घेतले जाणार नाही, असा सज्जड दम प्रशासनाने दिला आहे. या कठोर कारवाईमुळे राज्यातील अन्न व उपाहारगृह व्यवसायात मोठी खळबळ उडाली असून हॉटेल व्यावसायिकांमध्ये एकच 'फाफरा' उडाला आहे.