Pune : वर्दीचं स्वप्न अपूर्णच! पोलीस भरतीसाठी पुण्यात आलेल्या तरुणाने मित्राच्या खोलीत उचललं टोकाचं पाऊल; शहरात खळबळ

Pune :  पोलीस दलात भरती होऊन अंगावर खाकी वर्दी चढवण्याचं स्वप्न उराशी बाळगून आलेल्या एका 22 वर्षीय युवकाचा दुर्दैवी अंत झाला आहे. शिरूर तालुक्यातील शिक्रापूर येथे मित्राच्या खोलीवर वास्तव्यास असताना या तरुणाने गळफास घेऊन आपली जीवनयात्रा संपवली. या घटनेमुळे पोलीस भरतीची तयारी करणाऱ्या विद्यार्थ्यांमध्ये आणि परिसरात हळहळ व्यक्त केली जात आहे. विरू संजय काळे (वय 22, रा. मोळाचा ओढा, सैदापूर, ता. जि. सातारा) असं आत्महत्या केलेल्या तरुणाचं नाव आहे.

राहत्या खोलीत आयुष्य संपवलं
मिळालेल्या माहितीनुसार, विरू काळे हा मूळचा सातारा जिल्ह्यातील असून पोलीस भरती प्रक्रियेसाठी तो पुण्यात आला होता. शिक्रापूर येथे राहणारा त्याचा मित्र रणजीत साळुंखे याच्या खोलीवर तो थांबला होता. त्याच्यासोबत आदित्य साळेकर हा आणखी एक उमेदवार परीक्षेच्या तयारीसाठी तेथे आला होता. गेल्या दोन दिवसांपासून हे मित्र एकत्रित खोलीवर होते. मात्र, सायंकाळच्या सुमारास विरू याने अचानक राहत्या खोलीत दोरीने गळफास लावून घेतल्याची धक्कादायक बाब उघडकीस आली. ही बाब लक्षात येताच त्याला तातडीने खाली उतरवून उपचारासाठी जवळच्या रुग्णालयात दाखल करण्यात आले. मात्र, डॉक्टरांनी तपासणी केल्यानंतर त्याला मृत घोषित केलं.

Mumbai : प्रवाशांनी भरलेली खाजगी बस मेट्रो पुलाखाली पेटली; आगीने वेढलेल्या बसचा थरारक व्हिडिओ समोर

आत्महत्येचं कारण अस्पष्ट
या दुर्दैवी घटनेची माहिती विजय रामचंद्र काळे (वय 51, रा. सैदापूर, सातारा) यांनी शिक्रापूर पोलिसांना दिली. त्यांच्या खबरीवरून शिक्रापूर पोलीस ठाण्यात आकस्मिक मृत्यूची (एडीआर) नोंद करण्यात आली आहे. एवढ्या तरुण वयात मुलानं टोकाचं पाऊल उचलल्यानं काळे कुटुंबावर मोठा आघात झाला आहे. या प्रकरणाचा पुढील तपास शिक्रापूर पोलीस ठाण्याचे पोलीस हवालदार बापू हाडगळे करत आहेत. आत्महत्येचं नेमकं कारण अद्याप अस्पष्ट असून पोलीस सर्व बाजूंनी तपास करत आहेत. पोलीस भरतीच्या मैदानावर घाम गाळणाऱ्या तरुणाचा असा अंत झाल्याने हळहळ व्यक्त होत आहे. पोलीस आता शवविच्छेदन अहवाल आणि नातेवाईकांच्या जबाबावरून पुढील दिशा ठरवणार आहेत.