पुणे: मुळा-मुठा आणि भीमा नदीला महापूर! संगम-वाळकी पूल पाण्याखाली; दौंड तालुक्यात रेड अलर्ट

पुणे: चार दिवसांपासून सुरू असलेल्या मुसळधार पावसामुळे मुळा-मुठा आणि भीमा नदी दुथडी भरून वाहत आहेत. नदीपात्रातील पाणी झपाट्याने वाढल्याने दौंड तालुक्यातील संगम-वाळकी पूल पूर्णपणे पाण्याखाली गेला असून वाळकी आणि देलवडी गावांतील संपर्क तुटला आहे. प्रशासनाने परिस्थिती लक्षात घेऊन नागरिकांना सतर्कतेचा इशारा देत रेड अलर्ट जारी केला आहे.

सलग पडणाऱ्या पावसामुळे घाटमाथा आणि धरण परिसरातून मोठ्या प्रमाणावर पाण्याचा विसर्ग होत आहे. त्यामुळे मुळा-मुठा आणि भीमा नदीच्या पाणीपातळीत लक्षणीय वाढ झाली आहे. सोमवारी सकाळपासूनच संगम-वाळकी पुलावरून पाणी वाहू लागले आणि काही वेळातच पूल पूर्णपणे जलमय झाला. त्यामुळे या मार्गावरील वाहतूक बंद करण्यात आली.

पूरस्थितीमुळे दौंड तालुक्यातील अनेक कोल्हापूर पद्धतीचे बंधारेही पाण्याखाली गेले आहेत. नदीकाठच्या शेतकऱ्यांनी खबरदारीचा उपाय म्हणून आपल्या शेतातील विद्युत पंप आणि अन्य साहित्य सुरक्षित ठिकाणी हलवले आहे. पावसामुळे शेतीची कामे, वीटभट्ट्या आणि गुऱ्हाळ व्यवसायही काही ठिकाणी ठप्प झाले असून शेतमजूर आणि कामगारांना घरातच राहावे लागत आहे.

पूरस्थिती पाहण्यासाठी नदीकाठच्या परिसरात नागरिकांची मोठी गर्दी होत असल्याचे दिसून आले. विशेषतः पारगाव परिसरातील पुलावर भीमा नदीचे रौद्ररूप पाहण्यासाठी अनेक जण जमा झाले होते. मात्र प्रशासनाने नागरिकांना नदीकाठापासून दूर राहण्याचे आणि पूल किंवा बंधाऱ्यांवर जाणे टाळण्याचे आवाहन केले आहे.

हवामान विभागाने पुणे जिल्ह्यासाठी मुसळधार पावसाचा इशारा कायम ठेवला असून प्रशासन परिस्थितीवर सातत्याने लक्ष ठेवून आहे. आपत्ती व्यवस्थापन यंत्रणा, महसूल विभाग आणि स्थानिक प्रशासनाला सतर्क राहण्याच्या सूचना देण्यात आल्या असून नागरिकांनी केवळ अधिकृत सूचनांवर विश्वास ठेवावा आणि अनावश्यक प्रवास टाळावा, असे आवाहन करण्यात आले आहे.