बीड: पनीर नव्हे, विष खाताय? बीडमध्ये 'सॅफोलाइट' केमिकलच्या भेसळीचा भयानक प्रकार उघड; लाखो रुपयांचा साठा नष्ट!

बीड: जिल्ह्यातील शिरूर तालुक्यातील दहीवंडी येथे अन्न व औषध प्रशासनाने (FDA) केलेल्या धाडीत एक धक्कादायक आणि संतापजनक प्रकार समोर आला आहे. 'जय श्रीकृष्ण केक अँड बर्फी' उत्पादन केंद्रावर छापा टाकून, खवा आणि पनीर चकचकीत करण्यासाठी कापड उद्योगात वापरले जाणारे विषारी 'सॅफोलाइट' केमिकल वापरले जात असल्याचे प्रशासनाने उघड केले आहे.

नेमका प्रकार काय? अन्न व औषध प्रशासनाच्या पथकाने दहीवंडी येथील या केंद्राची तपासणी केली असता, तिथे खवा आणि पनीर आकर्षक आणि चमकदार दिसावे यासाठी औद्योगिक वापराच्या 'सॅफोलाइट' (सोडियम फॉर्मल्डिहाइड सल्फॉक्सीलेट) या रसायनाचा सर्रास वापर होत असल्याचे आढळून आले. हे रसायन प्रामुख्याने कापड उद्योगात रंगासाठी वापरले जाते आणि ते मानवी आरोग्यासाठी अत्यंत घातक व विषारी आहे.

 

काय काय जप्त झाले? या कारवाईत प्रशासनाला मोठ्या प्रमाणावर साठा सापडला आहे:पनीर आणि खव्यासह पामतेल आणि इतर भेसळीचे साहित्य.लाखों रुपयांचा मिल्क केक, बर्फी आणि कच्चा माल.हे साहित्य अत्यंत अस्वच्छ आणि असुरक्षित परिस्थितीत साठवले जात होते.

कारवाई: मिळालेली माहिती आणि मालाचा दर्जा पाहता, हा सर्व साठा आरोग्यासाठी घातक असल्याचे स्पष्ट झाले. त्यामुळे प्रशासनाने हा लाखो रुपयांचा मिठाई आणि कच्च्या मालाचा साठा घटनास्थळीच खड्डे खोदून नष्ट केला. तसेच, या केंद्राचा व्यवसाय तातडीने बंद करण्याचे आदेशही संबंधित मालकाला देण्यात आले आहेत. तुकाराम मुंढे यांच्या मार्गदर्शनाखाली अन्न व औषध विभागाने राज्यात सुरु केलेल्या धडक मोहिमेचाच हा एक भाग आहे.