बीड: जरांगेंच्या विरोधात का बोलतोस; बीडच्या पालीत मनोज जरांगेंच्या माजी सहकाऱ्यावर टोळक्याचा हल्ला, 'सुपारी' दिलनाचा गंभीर आरोप!

बीड: तालुक्यातील पाली येथील ऐतिहासिक नागनाथ मंदिर परिसरात रविवारी (११ ऑक्टोबर) दुपारी मराठा आरक्षण आंदोलनाचे नेते मनोज जरांगे पाटील यांचे माजी सहकारी अमोल खुणे यांच्यावर ५० ते १०० जणांच्या टोळक्याने लाठ्या-काठ्यांनी प्राणघातक हल्ला केला. या हल्ल्यात अमोल खुणे आणि त्यांचे चुलत भाऊ गंभीर जखमी झाले असून खुणे हे घटनास्थळीच बेशुद्ध पडले होते. त्यांना उपचारासाठी तातडीने बीड येथील जिल्हा रुग्णालयात दाखल करण्यात आले आहे. दरम्यान, "मनोज जरांगे पाटील यांच्या विरोधात बोलल्यामुळेच त्यांच्या सांगण्यावरून हा हल्ला करण्यात आला आणि नारायणगडावर होणाऱ्या दसरा मेळाव्यास मला जाता येऊ नये यासाठी ही सुपारी देऊन हल्ला घडवून आणला," असा खळबळजनक आरोप अमोल खुणे यांनी रुग्णालयातून केला आहे.

मंदिराचा दरवाजा आतून बंद करून बेदम मारहाण: मिळालेल्या सविस्तर माहितीनुसार, अमोल खुणे हे तुळजापूरहून आपल्या गावी ज्योत घेऊन येत असताना बीड जवळील पाली येथील श्री नागनाथ मंदिरात दर्शनासाठी थांबले होते. ते मंदिरात गेले असताना १५ ते २० जणांचे टोळके अचानक तिथे आले. हळूहळू तेथे ५० ते १०० जणांचा जमाव गोळा झाला. हल्लेखोरांनी मंदिराचा दरवाजा आतून बंद करून घेतला आणि "तू मनोज जरांगे यांच्या विरोधात का बोलतोस?" असा जाब विचारत लाकडी दांडके, काठ्या आणि लाथाबुक्यांनी त्यांच्यावर हल्ला चढवला.

या हल्ल्यात अमोल खुणे यांच्या दोन्ही हातांना, पाठीवर आणि डोक्याला गंभीर दुखापती झाल्या आहेत. मारहाण इतकी भीषण होती की ते मंदिरातच बेशुद्ध होऊन पडले. त्यांना वाचवण्यासाठी गेलेल्या त्यांच्या भावालाही जमावाने मारहाण केली.

जरांगे यांच्यावर गंभीर आरोप आणि राजकीय वातावरण तापले: अमोल खुणे हे पूर्वी मनोज जरांगे पाटील यांचे खंदे समर्थक आणि सहकारी म्हणून ओळखले जात होते. मात्र, काही महिन्यांपासून त्यांनी जरांगे पाटील यांच्या आंदोलनाच्या आर्थिक कारभारावर, निधीवर आणि कार्यपद्धतीवर जाहीर टीका करण्यास सुरुवात केली होती.

उपचारादरम्यान बोलताना खुणे यांनी सांगितले, "आगामी नारायणगडावरील दसरा मेळाव्यात मी जरांगेंच्या विरोधात मोठा खुलासा करणार होतो. मला या मेळाव्याला जाता येऊ नये आणि माझा आवाज दाबता यावा, यासाठीच मनोज जरांगे आणि त्यांच्या समर्थकांनी कट रचून हा हल्ला घडवून आणला आहे."

पोलीस तपास आणि परिसरात तणाव: घटनेची माहिती मिळताच बीड ग्रामीण पोलीस ठाण्याचे अधिकारी व कर्मचाऱ्यांनी घटनास्थळी आणि जिल्हा रुग्णालयात धाव घेतली. पोलीस या घटनेचा गांभीर्याने तपास करत असून, मंदिराच्या परिसरातील सीसीसीटीव्ही (CCTV) फुटेज आणि प्रत्यक्षदर्शींच्या आधारे हल्लेखोरांची ओळख पटवण्याचे काम सुरू आहे. या घटनेमुळे बीड जिल्हा आणि मराठवाड्यातील राजकीय व सामाजिक वर्तुळात प्रचंड खळबळ उडाली असून तणावाचे वातावरण निर्माण झाले आहे.