पुण्यात संतापजनक! मुळशीत आईस्क्रीम विक्रेत्याकडून अल्पवयीन मुलीचा विनयभंग; नराधमाला गावकऱ्यांनी पकडून चोपले

पुणे, मुळशी:
पुणे जिल्ह्याच्या मुळशी तालुक्यातील एका गावात माणुसकीला काळीमा फासणारी एक संतापजनक घटना समोर आली आहे. आईस्क्रीम विकण्याच्या बहाण्याने आलेल्या एका नराधमाने १४ वर्षीय गतिमंद मुलीचा विनयभंग केल्याचा प्रकार घडला आहे. याप्रकरणी पौड पोलिसांनी आरोपीला बेड्या ठोकल्या आहेत.

नेमकी घटना काय?
मिळालेल्या माहितीनुसार, आरोपी पिंटू शिवकुमार (वय २८, मूळ राहणार उत्तर प्रदेश, सध्या राहणार सूस, पुणे) हा दुपारी दोनच्या सुमारास दुचाकीवरून गावात आईस्क्रीम विकण्यासाठी आला होता. पीडित मुलगी तिच्या लहान चुलत बहिणीसोबत आईस्क्रीम घेण्यासाठी आरोपीच्या गाडीजवळ गेली होती. यावेळी आजूबाजूला कोणीही नसल्याचा फायदा घेत, आरोपीने आईस्क्रीम देण्याच्या बहाण्याने मुलीला आपल्याकडे ओढले आणि तिचा विनयभंग केला.

गावकऱ्यांनी दाखवले धाडस:
या प्रकारामुळे पीडित मुलगी घाबरली आणि तिने तात्काळ घरात धाव घेऊन पालकांना सर्व हकीगत सांगितली. आपली मुलगी संकटात असल्याचे समजताच पालकांनी आणि परिसरातील नागरिकांनी तात्काळ बाहेर धाव घेतली. गावकऱ्यांनी आरोपीला पकडण्याचा प्रयत्न केला असता, त्याने दुचाकीवरून पळून जाण्याचा प्रयत्न केला. मात्र, नागरिकांनी त्याचा पाठलाग करून त्याला पकडले आणि पोलिसांच्या स्वाधीन केले.

पोलिस कारवाई:
या घटनेप्रकरणी पौड पोलीस ठाण्यात गुन्हा दाखल करण्यात आला आहे. पोलिसांनी आरोपी पिंटू शिवकुमार याच्यावर भारतीय न्याय संहिता (BNS) कलम ७४ आणि 'पोक्सो' (POCSO) कायद्याच्या कलम ८ व १२ अंतर्गत कारवाई करत त्याला अटक केली आहे. या घटनेमुळे मुळशी परिसरात तीव्र संताप व्यक्त केला जात असून, अशा विकृत मानसिकतेच्या गुन्हेगाराला कठोर शिक्षा व्हावी, अशी मागणी नागरिकांनी केली आहे.